Me lahutë në dorë, 79-vjeçari Hysen Lamnica, çdo ditë e ngjit në këmbë rrugën nga Fierza për në Valbonë.
Arsyeja është e thjeshtë: Gjatë verës në Valbonë ka turistë që e shpërblejnë me bujari rapsodin, për interpretimin e këngëve popullore.
E preferuara e tij është kënga për nderin e Kombit, Dervish Luzha, patriot e klerik, që i la gjurmë të pashlyeshme në kujtesë.
“Që në kohën e fëmijërisë jam prezantuar me të, ai e mbante gjithmonë lahutën me vete. Më ka dashur, më ka respektuar, më ka dhënë për të ngrënë dhe ka qenë burrë i lartë”.
Na tregon se lahuta që mban në dorë është 33-vjeçare, punuar nga një mjeshtër i zonës së Lekbibajt.
Pjesë e repertorit të tij është edhe kënga për Rukie Ramën, mësuesen që vuajti në burgjet e diktaturës.
Ndërkohë që gëzohet për "K’cimin e Tropojës" në UNESCO, është i keqardhur se lahuta po përvetësohet nga Serbia.
“E mori serbi. Pse? Se ky dhe ky nuk ishin gjallë (Gjergj Fishta dhe Dervish Luzha), se po të ishin e kishin mbrojt”.
Rapsodi Hysen Lamnica është me origjinë nga fshati Geghysen i Tropojës, pjesë e Malësisë së Gjakovës, trevë kjo që ka luftuar me shovinistët serbo-malazezë, ndaj një pjesë e mirë e këngëve janë me nota patriotike.
Komente
