Presidenti amerikan Donald Trump synon të nënshkruajë ligjin e aprovuar nga Senati për të mbështetur protestat për demokraci në Hong Kong.
Mediat amerikane kanë shkruar se Trump është i gatshëm të nënshkruajë masën ligjore të quajtur "Akti i të Drejtave të Njeriut dhe Demokracia e Hong Kongut", akti i cili tashmë ‘ka ngritur’ zemërimin e Kinës edhe para se ligji të hynte në fuqi.
Masa ligjore e Senatit do të thotë rishikim i statusit të veçantë financiar të garantuar nga Washingtoni për Hong Kong-un, ndërsa trazirat dhe dhuna vazhdojnë në ish-koloninë Britanike.
Bursa e Hong Kong, pas aprovimit nga Senati të masës ligjore, ka nisur rënien e lirë kurse tregjet e aksioneve në Shanghai dhe Shenzhen janë frenuar.
Çfarë parashikon Ligji për të drejtat e njeriut dhe demokracinë në Hong Kong?
Kjo është një masë për të mbështetur "të drejtat e njeriut dhe demokracinë" kundër shtypjes së lëvizjes protestuese të Kinës. Teksti parashikon sanksione ndaj autoriteteve kineze dhe Hong Kong-ut që shkelin të drejtat dhe krijon një rishikim vjetor të statusit të veçantë që gëzonte ish-kolonia britanike, me avantazhe tregtare dhe ekonomike të dhëna nga Washingtoni. Ndalohet shitja dhe eksporti në Hong Kong i gazit lotsjellës, plumbave të gomes dhe sendeve të tjera të përdorura për të shtypur protestat.
Komente
