Sergio Perez dhe Max Verstappen i kanë bërë një nisje të mirë këtij sezoni në Formula 1, duke mbajtur Red Bull në krye të klasifikimit. Dyshja kanë shkëlqyer, teksa skuderia gjermane është rrugës për titullin e radhës. Ka qenë drejtori sportiv Christian Horner që ka ironizuar rivalët.
“Pesë gara dhe pesë fitore, plus triumfin në garën sprint dhe katër fitore të dyfishta. Nuk kemi patur kurrë një fillim-sezoni të tillë”, shprehet i lumtur Christian Horner, drejtori sportiv i Red Bull Racing.
“Pyetja që i bëjmë vetes është: Ku janë të tjerët? Ku është Ferrari e Mercedes? Gjatë dimrit punuam normalisht, duke rritur potencialin e makinës ashtu siç ka bërë çdo skuadër tjetër besoj. Ndaj habitemi se përse rivalët tanë janë kaq pas, ku kanë humbur?”, shprehet më tej shefi i makinës kampione bote në Formula 1.
“Besoj se rivalët tanë janë duke punuar për të sjellë disa risi në garat që zhvillohen në Europë. Ne po kursejmë energjitë dhe fondet për disa risi në pjesën e dytë të sezonit, duke qenë se kemi një penalitet. Gjithsesi, ne po dominojmë dhe kjo na gëzon, pasi tregon se kemi bërë një punë të shkëlqyer”, tha Horner.
