Kompozitori i njohur shqiptar Haig Zacharian të mërkurën ishte i ftuar në Akademinë e Shkencave.
Profesor në Universitetin e Arteve dhe autor i dhjetra veprave muzikore në një periudhë 50-vjeçare, Zacharian ka fituar simpatinë e dashamirësve veçanërisht për kolonën zanore në më shumë se 30 filma artistikë.
Në takimin e djeshëm që u organizua nga Qendra e Studimeve të ASHA, kompozitori durrsak iu përgjigj pyetjeve të dr. Ermir Ballgjatit, si dhe artistëve të shumtë, të pranishëm në sallën “Aleks Buda” të Akademisë.
Rrëfimi i prof. Zacharian, nisi që nga rrethanat e familjes së tij armene në Durrës; mësimet e pianos me mësuen Lili Tafaj, për tu ndalur më gjatë në ndikimin e pedagogëve për formimin e tij në Institutin e Lartë të Arteve (sot Universiteti i Arteve).
Veçmas, ai vlerëson kompozitorin Tonin Harapi, pedagogun që “e dashuronte muzikën”.
Lektori sjell një pasqyrë të qartë të zhvillimeve në periudhën e “realizmit socialist”, gjatë së cilës ai punoi për periudha të gjata kohe, që nga përgatitja e grupeve amatore në HC e Fierzës, formimi i nxënësve në shkollën “Mujo Ulqinaku” të Durrësit deri te kompozimet e interpretuara në Dekadat e Majit apo në filmat artistikë.
Biseda e prof. Haig Zacharian u shqërua me komente të pjesëve muzikore, nga filmi i “Ilegalët” i regjisorit Rikard Ljarja, bashkëpunimi i parë në “artin e shtatë”, deri te filmat e fundit me regjisorin Pluton Vasi.
“Lectio Magistralis” është një cikël bisedash me artistë të shquar, që ka nisur në shkurt të vitit të kaluar, i ideuar dhe prezantuar nga drejtori i Qendrës së Arteve Stefan Çapaliku.
Komente
