Ish-kreu i KQZ, Kristaq Kume u shpreh se nuk duhet të ketë ndryshim të sistemit zgjedhor aktual, proporcional rajonal. Në studion e ‘Frontline’ në Report Tv, Kume tha se duhet që sistemi të jetë i njëjti por të zbatohet ndryshe, me 4 rajone zgjedhore dhe jo 12 siç është aktualisht.
“Te kjo pikë jam me atë që tha Blendi Klosi, nuk duhet të ndryshohet sistemi që kemi aktualisht. Nëse sistemi do ishte ky proporcional rajonal por i zbatuar ndryshe, mos të kemi 12 njësi zgjedhore por në 4 rajone zgjedhore. Votimi të bëhet me lista të hapura 100%. Kushtetuta ka një ‘marifet’, thuhet se qytetari ka të drejtë të shprehet në votë parapëlqyese për përfaqësuesin në 2/3 e listës. Struktura e parlamentit nesër do jetë shumë më afër votës së hedhur. Ndryshimet bëjnë që demokracia përfaqëuese të jetë edhe më e mirë se sot. Po ashtu shton edhe pjesëmarrjen”- tha Kume.
Ai gjithashtu i bëri një thirrje qeverisë dhe opozitës për heqjen e bashkëkryetarëve në mënyrë që të zgjidhet debati që ka kapluar sot opozitën për zëvendësimin e Alibeajt me Bylykbashin.
“Hiqni dorë nga bashkëkryetarët, mos të ketë të tillë. Të vendosë për ndryshimet me shumicë të cilësuar me 11 anëtarë, gjë që e bën bipartizan me pjesëmarrje të 2 palëve dhe komisioni të drejtohet nga një prej anëtarëve”- argumentoi ish-kreu i KQZ.
Lajmi kryesor:
Reforma Zgjedhore, Klosi: Dyshoj se në mbledhje do kemi përplasje! Sula: Do jem i pranishëm, kërkojmë zëvendësimin e Alibeajt si bashkëkryetar
B.V//ReportTv.al