Ambasada e Britanisë së Madhe ka marrë në patronazh certifikimin e zgjedhjeve parlamentare të 11 majit.
Thirrja për informim në ambasadë e trojkës apo Task-Forcës për krimet zgjedhore të SPAK-Prokurori e Përgjithshme-KQZ ishte një shenjë se tashmë do të jetë Britania ajo që do ketë në dorë monitorimin e zgjedhjeve apo arbitrimin.
Për ironi të fatit, është po ky vend që ka shpallur ‘non grata’ Sali Berishën, bashkë me SHBA-të. Por pyetja që u ngrit në panelin e ‘Repolitix’ mbrëmjen e sotme, në Report Tv nga disa prej të ftuarve, ishte:
'A do e pranojë pas këtij zhvillimi Berisha në rast se humbet rezultatin e zgjedhjeve pas 11 majit nëse Ambasada Britanike dhe faktori ndërkombëtar certifikojnë rezultatin, apo do akuzojë si gjithnjë pas humbjes për vjedhje votash nga ana e Edi Ramës dhe mazhorancës'.
Në panelin e moderatorit Denis Minga ishin gazetari Anri Bala, avokati Përparim Çaça, kandidati i PD-së Aulon Kalaja dhe ai i PS, Mirgit Vataj.
“Lidershipin e ka marrë Ambasada Britanike dhe besoj se nuk ka lidhje me lajm të keq për PD-në. Ka angazhim i posaçëm që ka lidhje me SPAK, për hetime të posaçme për krimet zgjedhore. Ka ardhur momenti që krimet zgjedhore të mos kalojnë kaq lehtë. SPAK nuk duhet ta bëjë punën vetëm pse ftohet nga ambasadat dhe diplomatët, por si detyrim. Sigurisht që faktori ndërkombëtar do jetë i rëndësishëm në zgjedhje dhe monitorimin e tyre. Do jetë e vështirë edhe për SPAK goditja e krimit zgjedhor, pasi nuk mund të eliminohet plotësisht, por nuk do të ketë më krime zgjedhore si dikur. Çdo ofert për votën është krim zgjedhor”, tha avokati në studion e Report Tv.
Por gazetari Bala ngriti një pyetje të madhe, ai e sheh këtë zhvillim edhe si një shenjë certifikimi të pakundërshtueshëm të rezultatit, për të mos i dhënë shanse partisë apo koalicionit humbës për t’u ankuar për vjedhje votash.
“SPAK e ka hapur një lloj dritareje për krimin zgjedhor, ata që duan ta denoncojnë. Edhe KQZ e hapi sot për denoncimin e krimin zgjedhor. Nuk e di se në çfarë cilësie i ftoi krerët e SPAk, PP dhe KQZ, por nuk e shoh ambasadën britanike në kushtet që të kërkojë llogari, duke qenë edhe jashtë BE-së. Deri tani nuk e dimë nëse ka ndonjë denoncim, rast apo ndikim, nuk e kemi këtë informacion. Kjo çon ujë në mullirin e Edi Ramës, sepse nëse më 11 maj PS fiton, do i bjerë alibia PD-së për vjedhje dhe manipulim votash. Sigurisht ka pasur deri tani dhe jo vetëm nga Rama, pasi edhe këta të tjerët nuk janë burra të mirë. Pra ka raste nga të gjitha krahët të tilla.
Fakti tjetër interesant është se Berisha është non grata nga Britania, ashtu sikurse nga SHBA, por tek e para edhe më e rëndë, për lidhje me pagesat por edhe me krimin e organizuar. Kurse në lidhje me dosjet e Durrësit dhe Dibrës dukej qartë se nuk kishte vendim gjykate për përgjimet e kryera, por ‘prokurorët e gështenjave’ dhe të partive dikur i çonin përgjimet te partitë apo te BILD. Çështja është se nëse ambasada britanike dhe të tjerat certifikojnë zgjedhjet, Berisha i humbet, a do e respektojë statutin e PD-së të largohet, apo do thotë prapë u vodhën?”, u shpreh gazetari.
Ndërsa kandidati i PD-së, Kalaja, solli si precedentë rastet e dështuara të SPAK për hetimin e krimit zgjedhor në Durrës e Dibër, duke shtuar se mosbesimi i tij për Prokurorinë do të mbetet gjithnjë.
“Ka pasur manipulime të votës nga ana e PS, duke nisur nga dosja e Durrësit dhe e Dibrës, 184 dhe 339, ku flitej për tërmet apo tsunam votash dhe me emra konkret. Pra SPAK duhet të kishte hetuar të dyja rastet, ka besim dhe mosbesim për Prokurorinë, pra nuk mund të bëjë hosana për ta, sepse e dimë se ka njerëz atje që kanë marrë para dhe do dalin në vijim. Unë e mbështes SPAK për punët e mira dhe e kritikoj për ato jo të mira. E mbështes SPAK për Task-Forcën për krimet zgjedhore, por kam ende mosbesim duke parë precedentin me Durrësin apo Dibrën. Fakti që nuk janë hetuar dhe hetimet kanë rënë, është shumë e rëndë. Ka dy standarde, u dënua ish-kryetari i bashkisë Shkodër dhe njerëzit e tij, që as e fituan bashkinë, për blerje votash, por jo këta të PS që fituan 61 bashki”, nënvizoi ai.
Mirgit Vataj, kandidat i PS për zgjedhjet e 11 majit, u shpreh se të dyja kampet politike apo partitë e mëdha mundohen që të blejnë vota, por Task-Forca e ngritur dhe monitorimi nga ndërkombëtarët këtë herë do ua vështirësojë.
“Nuk e shoh si gjë të jashtëzakonshme, por rutinë, që mund të vazhdojë edhe më vonë. Akuzat për manipulim votash kanë qenë gjithmonë dhe besoj se do të jetë edhe pas 11 majit, pasi e dimë se PD gjithmonë ka akuzuar për vjedhje votash dhe mund ta bëjë përsëri nëse humbet. SPAK ka qenë aty edhe më parë. Proces që do vazhdojë, sot është Britanikja, nesër mund të jetë dikush tjetër. Këtë herë është Anglia si arbitër ndërkombëtar. Në lidhje me dosjet e Dibrës dhe Durrësit, pse në krahun tjetër kryetari i PD-së nuk interesohet për votën, nuk sillet si këta të tjerët? Me llogjikë, po t’i hysh telefonave të kandidatëve çfarë nuk gjen për punën e votave”, tha ai.
Avokati Përparim Çaça mendon se lufta e brendshme në PD vjen edhe nga fakti i informacioneve të brendshme për sondazhet që posedojnë, mungesës së optimizmit për fitoren dhe kjo rrit konkurrencën për të fituar mandat deputeti apo përplasjet për emrat në listat e hapura dhe të mbyllura.
Sipas tij, konkurrenca në PD është më e madhe se te PS, pasi kandidatët e mazhorancës shprehen se punojnë për skuadrën, për fitoren e partisë, pasi besojnë se edhe nëse nuk zgjidhen deputetë, PS do jetë në pushtet.
E kundërta te PD, e cila duke qenë pesimiste për rezultatin, rrit tensionet e brendshme.
“Lufta e brendshme vjen më shumë edhe për faktin se në PD psh., debatet ishin të mëdha për përfshirjen në listat e mbyllura apo përzgjedhjen e emrave në listën e mbyllur. Shumë s’i pranuan emrat në listën e hapur edhe nga fakti se duke njohur situatën, sondazhet dhe vështirësinë për të fituar, kanë sjellë edhe reagimet e tyre. E njëjta edhe me listën e hapur dhe votën preferenciale. Kurse në krahun tjetër, kandidatët e PS flasin për punë në grup, rezultat, fitore për partinë, pasi e dinë edhe nga sondazhet e tyre të brendshme, se do fitojë PS dhe do jenë në pushtet”, tha anëtari i PD-së Çaça mes të tjerash.
Vota preferenciale mbetet një rrezik për zgjedhjet parlamentare që do të mbahen më 11 maj. Këtë rrezik e kanë ndjerë edhe kryetarët e dy partive të mëdha, PD e PS.
Edi Rama ka dhënë mesazh për strukturat e tij në Tiranë që kandidatët e listës së mbyllur mos ta orientojnë votën preferenciale te kandidatë të caktuar të listës së hapur, por të fokusohen te vota e partisë.
Të njëjtën gjë ka bërë po sot edhe kryetari i PD-së, Sali Berisha, duke porositur kandidatët për votën e partisë në radhë të parë dhe pastaj për veten e tyre.
Avokati Përparim Çaça nxori në pah në emisionin ‘Repolitix’ në Report Tv, një fakt tek kandidatët demokratë, duke thënë se “ata kujtojnë se janë ende në garën e Primareve”, kur në fakt është e kundërta, pasi vota kërkohet në popull apo te të pavendosurit. Ai shton se e njëjta situatë duket se është edhe te PS.
“Rama po mundohet të bëjë protagonistë disa personazhe të tjerë. Por ka edhe parti të reja. Por tonin fushatës do ia japin kandidatët në listat e hapura. Tani ka filluar edhe ajo lufta e brendshme, kryesisht me strukturat në qendër dhe rrethe. Kandidatëve të PD-së u duket sikur janë akoma në Primare. Pra duke u përpjekur të marrin strukturat dhe jo në popullatë me të pakënaqur dhe të pavendosur. E njëjta gjë edhe me kandidatët e PS. Psh. në Tiranë se është edhe qarku më i madh, ku vetëm 10 mandate janë në lojë, sepse 24 janë caktuar me listat e mbyllura. Mesazhi që ka dhënë Rama vlen edhe për ata të PD, e njëjta situatë është.
Ka rrezik që ata që janë në listën e mbyllur, mund ta orientojnë votën tek kandidatë të listës së hapur të preferuar.
Këtu rreziku qëndron tek pragu i lartë që krijohet nëse orientohet vota, pasi nëse do nominoheshin ata të listës së mbyllur, pragu do ishte më i ulët. Kjo penalizon vetëm kandidatët”, u shpreh Çaça në ‘Repolitix’.
Avokati bëri edhe diversion në studio, duke thënë se “Rama i ka 7 kandidatë të preferuar të listës së hapur, pasi aty është gara e ujqërve”.
Kurse kandidati i PS, Mirgit Vata, e kundërshtoi dhe u shpreh:
“Nuk besoj se ka shqetësim për këtë çështje, madje as nga Berisha. Unë e shoh si një garë dhe punë në skuadër. Nuk ka listë të preferuar të kryetarit, unë jam kandidat i listës së hapur të Tiranës dhe nuk i besoj kësaj, nuk është i vërtetë. Ky është mesazh për të ndezur motorët e fushatës dhe procesin, për të mbajtur të unifikuar skuadrën”.
Çaça nënvizoi se:
“Ujqërit e PD-së, në të kundërt me ata të PS-së, janë në listë të mbyllur, e kanë mbyllur historinë e luftës së brendshme”.
Kandidati i PD-së, Aulon Kalaja theksoi se prioritet është vota për partinë, numrin një dhe ky është mesazhi i Berishës.
“Nëse do të orientohet vota, unë do jem i pari që do e denoncoj. Prioritet është numri 1, vota e PD-së, pastaj kandidati. Ky ishte edhe mesazhi i Berishës. Unë jam kandidat në Durrës dhe kryesisht zona e Krujës dhe Fushë-Krujës”, tha gazetari që i ka hyrë politikës.
Gazetari Anri Bala shtoi se kandidatët kanë një garë të fortë në listën e hapur, por ndryshe nga PD, PS e ka edhe më të ethshme betejën për votën, pasi ‘ujqërit i ka nxjerrë në listë të hapur.
“Është e vërtetë se në listat e hapura të PS-së ka ujqër, por Rama i ka futur aty për të grumbulluar vota. Ndryshe me listën e PD-së, pasi pjesën më të madhe i ka në listat e mbyllura, ashtu sikurse e tha edhe avokati Çaça. Problemi është kur 12-shja e parë e sigurt punon për të listës së hapur, emrat preferencialë. Dhe duket se duke ndjerë pikërisht shqetësimin se kjo e dëmton partinë, ka ardhur edhe mesazhi i Ramës. Kjo dëmton edhe garën”.
Komente
E ndoqa takimin tek Denis Minga.Më bëri përshtypje se si SALISTI AURON KALAJA ISHTE KUNDËR MARRJES SË PASAPORTËS SË BE PASI IKIN SHQIPËTARËT NGA EDI RAMA,NDËRSA ME HEQJEN E VJZAVA NGA SALIU NUK IKIN. Ndaj,Saliu është kundër BE,SHBA,ANGLISË. Po kështu u quajt fai i RËNDË QË Ambasada Angleze takoi krerët e SPAK,PREK.PËTGJITHSHËM,KREUN E KQZ,PASI AMBSDADA ANGLEZE KA SHPALLUR NON GRATA SALIZIUN.!!
Përgjigju