Reforma e pensioneve dhe programi elektoral i partive të mëdha, PD dhe PS, ishin objekt i diskutimeve dhe debatit mbrëmjen e sotme në ‘Repolitix’.
Të ftuar në panelin e moderatorit Denis Minga, në Report Tv, ishin deputetja socialiste Blerina Gjylameti dhe kandidati i PD-së për deputet në zgjedhjet e 11 majit, Ilir Alimehmeti, gjithashtu dhe dy gazetaret e televizionit, Raziela Myslimaj dhe Danjela Maloku.
Ligjvënësja e mazhorancës theksoi se që nga viti 2013 reforma dhe skema e pensioneve dhe rrogave ka ardhur në progres rritës sikurse dhe ishte premtuar nga kryeministri Edi Rama.
Ajo pohoi se bashkë me Bankën Botërore po shikohet skema e pensioneve, ndihmës sociale dhe rrogave.
“Pensionet dhe pagat kanë qenë prioriteti i PS-së që prej vitit 2013 kur erdhi në pushtet dhe në vijim, aktualisht edhe në programin elektoral për zgjedhjet e 11 majit. Po finalizojmë punën e një grupi bashkë me Bankën Botërore, për rishikimin e skemës së pensioneve. Por është një reformë që ka edhe pasoja për shkak të informalitetit që ka qenë ndër vite, por ndryshimi vihet re, por pasojat janë rezultat të atyre viteve për të cilat folëm, para dhe pas 2015. Kemi sot pensionin social, kur dikur nuk ishte fare, por përsëri janë të pamjaftueshme për t’i quajtur dinjitoze. Por ky është proces, ku u nis me formalizimin e tregut të punës dhe siguracionet e deklaruara apo kontributet, që sjell edhe rritjen e pensioneve në të ardhmen. Pastaj flasim për dy bonuset, që përsëri janë të pamjaftueshme, ndaj edhe skema po rishikohet. Pensioni minimal është mbi 150 mijë lekë dhe parashikohet që në katër vite të shkojë të paktën 200 mijë lekë dhe deri në 2030 të paktën 400 euro. Programi i PD-së është si ‘Liza në botën e çudirave’ dhe listë dëshirash, sepse s’mund të katërfishohet në 100 ditë ajo që është bërë deri tani. Si do realizohet, duke mos paguar borxhet, energjinë, ujin, si. Si do realizohet, duke mos paguar borxhet, energjinë, ujin, siç ishte edhe më parë”, tha Gjylameti.
Por Ilir Alimehmeti e akuzoi PS-në dhe kryeministrin Edi Rama për vjedhjen e programit ekonomik të PD-së, duke ndryshuar vetëm disa linja sipërfaqësore shifrash.
“Ne e quajmë paketë emergjence apo të dhembshurisë. Kemi shumicën dërmuese që janë më poshtë se dyshemeja, kurse këta flasin për tavanit. Kjo është ‘prit gomar të mbijë bar’. Ne flasim për 100 ditë, nevoja është sot. Emergjencës nuk mund t’i përgjigjesh deri më 2030-ën. Rama pa programin e PD-së, e për të mos e kopjuar fiks, futi disa shifra të tjera të 2013-ës dhe thotë se do i bëjë deri në 2030-ën. Ndihma ekonomike është 60 mijë lekë, ne do e çojmë të paktën 200 euro si minimum jetik, pra kalkulimi është afro 200 euro. Janë edhe shifra të INSTAT-it, nuk mbijetohet me këto shifra që janë aktuale. Parlamenti duhet të ishte mbledhur me kohë dhe të kishte vendosur për minimumin jetik dhe të bënte kalkulimet. Brenda 100 ditëve rriten pensionet 200 euro, 500 euro rroga minimale brenda 100 ditëve, edhe pensionet 200 euro, ulja e çmimit të energjisë, 10% taksa e sheshtë”, u shpreh përfaqësuesi i PD-së.
Gazetarja Raziela Myslimaj u shpreh se programet që ofrojnë të dyja forcat e mëdha janë përgjithësisht të realizueshme.
“Mendoj se objektivi kryesor i kryeministrit Edi Rama është Shqipëria drejt anëtarësimit në BE më 2030”, tha gazetarja e Report Tv.
Kurse gazetarja Danjela Maloku nënvizoi se PD-ja arriti një fitore të vogël paraprakisht, që e tërhoqi PS-në në pikën e diskutimit të programit.
Por vuri në dukje se kampi opozitar ka problematikën e përçarjes në disa fraksione, përfshi edhe atë të Lulzim Bashës.
A ka luftë të brendshme brenda PD dhe PS për votat e 11 majit që i nxjerrin kandidatët e listave të hapura deputetë të parlamentit, pasi janë edhe më të rrezikuarit?
A janë të shqetësuar kreu i mazhorancës Edi Rama dhe ai i PD-së, Sali Berisha për luftën e brendshme mes kandidatëve, që dhanë mesazhe se kandidatët e listave të sigurta nuk duhet të ndikojnë për votën preferenciale te emra të caktuar të listës së hapur?
Këto ishin dy nga pyetjet e ngritura sot në panelin e ‘Repolitix’ në Report Tv, drejtuar deputetes socialiste Blerina Gjylameti dhe kandidatit demokrat Ilir Alimehmeti.
Gjylameti e mohoi se ajo po punon për vota preferenciale apo se ka kontaktuar kandidatët e listës së mbyllur që ta ndihmojnë në votat preferenciale.
“Nuk ka indicio të tilla dhe as shqetësim apo luftë të brendshme në PS për votat. Sfidën e kemi me veten. Puna është në grup. Nuk fokusohem tek votat nga deputetët e listës së mbyllur. Kemi strukturë që punon në përditshmëri, nuk kemi boshlliqe. Përfshi edhe zotin Veliaj, që nuk ka lënë boshllëk, sepse struktura e PS-së punon në mënyrë të atillë që nuk i lë këto hapësira dhe ndihmojnë grupin dhe njëri-tjetrin. Ne prisnim 20 mandate në Tiranë, qëllimi ynë është rritja e pritshmërive në krahasim me zgjedhjet e kaluara, ku morëm 19 mandate, pra synojmë edhe një mandat më shumë”, tha ajo për Report Tv.
Kurse Alimehmeti, i cili doli ndër më të votuarit në Primaret e PD-së në Tiranë, por nuk u përfshi në listën e sigurt, tha se ajo ishte përgjegjësia e Kryesisë dhe për këtë çështje dhe përgjegjësitë ishte lënë të diskutohej pas 11 Majit.
“Ne mendojmë nëpërmjet programit në radhë të parë. Lista u bë nga kryesia, aty janë privilegjet dhe përgjegjësitë. Është lënë për diskutim kjo çështje pas 11 majit. Prioriteti im është të nxjerr veten dhe një deputet tjetër”, tha ai.
Debati në studion e ‘Repolitix’ mbrëmjen e sotme u fokusua edhe tek ajo që mund të ndodhë pas 11 majit nëse dy forcat e mëdha fitojnë, PS për mandatin e katërt dhe PD për t’u rikthyer në pushtet pas 12 vitesh në opozitë.
Gazetaret e Report TV, Danjela Maloku dhe Raziela Myslimaj i bënë disa pyetje dy të ftuarve politikë në panel, deputetes Blerina Gjylameti nga PS dhe Ilir Alimehmeti nga PD.
Përfaqësuesi dhe kandidati demokrat iu përgjigj një pyetjeje ngacmuese për një “qeveri hije” të PD-së aktualisht, nëse do fitojë zgjedhjet.
Ai tha se janë ngritur struktura të caktuara për çdo fushë që kanë përgatitur programin prej muajsh dhe tani po e prezantojnë. Secila strukturë paraqet programin për fushën përkatëse, duke lënë të kuptohet se ata që e shfaqin pritet të jenë edhe ministrat e ardhshëm të kabinetit sipas linjës.
“Ne kemi ngritur struktura për të hartuar programin sipas fushave përkatëse, ku unë vetë përfaqësoj atë të Shëndetësisë. Të tjerët prezantojnë programet përkatëse. Mjafton të shikoni se kush prezanton programin në takimet që bëhen nga PD, merrni lapsin dhe mbani shënim”, iu përgjigj Alimehmeti pyetjes së gazetares Maloku për emrat e ministrave të mundshëm.
Komente
Ujku qimen e nderron por zakonin s'e harron! - Fluturon gomari? - Me Sali Ram Berishen mendoj se po dhe thenia "shqiptaret do hane me luge floriri" behet realitet! Vetem kur hap syte dhe zgjohesh nga kjo ender e bukur thua qe Luli s'paska qene dhe aq keq me 7x7= 42 se me PD s'e paskan mbjelle fasulen gjigante te thesari i shtetit qe prodhon vetem flori per te mbyllur gropen qe krijon programi i dhembshurise!
Përgjigju