Fier- Report tv ka mësuar detaje te reja rreth aksidentit në punë ku humbi jetën punëtori egjiptian, Mahmud Said. 37-vjeçari punonte në një kompani shqiptare e cila po nderton linjën e interkonjeksionit Shqipëri-Maqedoni e Veriut. Ai ka rënë nga lartësia dhe ka humbur jetën në vend, pasditen e së mërkurës, në zonën e Ruzhdies në Patos.
Burimet nga policia thanë se 37-vjeçari ishte me veshje të punës por nuk kishte varur litarin mbrojtës teksa punonte në lartësi. Viktima punonte me një brigade kryesisht me punëtorë e specialiste egjiptian¡ që merren me montimin e shtyllave të tensionit të lartë.
Për aksidentin e rëndë në punë janë shoqeruar dhe po merren në pyetje punetore të vendit te ngjarjes dhe inxhinieri i punimeve. Ende Policia e Fierit nuk ka asnjë të arrestuar për ngjarjen.
Kujtojme se puna për ndërtimin e linjës 400 kV mes Shqipërisë dhe Maqedonisë së Veriut ka nisur 9 muaj më parë. Projekt kushton 70 milionë euro dhe përfshin ndërtimin e linjave të transmetimit Fier – Elbasan dhe Elbasan – Qafë Thanë.
