Pak orë larg Spanjës, ky vend ka vlera të pakrahasueshme dhe pesë atraksione turistike mahnitëse, sipas një artikulli të botuar në revistën argjentinase “La Nacion”.
Për shumë turistë, udhëtimi në Evropë mbetet një ëndërr e shumëpritur, por një buxhet i pamjaftueshëm do të ishte pengesa kryesore.
Kur paguani për biletat, akomodimin, ushqimin dhe transportin në destinacionet tradicionale si Parisi, Roma apo Barcelona, ato mund të dekurajojnë vizitorët që duan të eksplorojnë kontinentin e vjetër.
Megjithatë, ekziston një destinacion që është vetëm pak orë larg me avion nga Spanja. Akomodimi në apartamente private kushton vetëm 10 euro nata.
Përveç kësaj, gastronomia është e pasur dhe e aksesueshme për të gjitha buxhetet, pasi ofrohen hotele me mëngjesin duke nisur nga 20 euro.
Ndryshe nga kryeqytetet e tjera evropiane, akomodimi dhe transporti në Shqipëri ofrohen me çmime dukshëm më të ulëta, duke e bërë atë një destinacion ideal për ata që duan të kursejnë para gjatë udhëtimit të tyre.
Me një gamë të gjerë akomodimesh të përballueshme në platforma të tilla si, “Booking” dhe “Airbnb”, vizitorët mund të gjejnë opsione që i përshtaten nevojave dhe buxhetit të tyre.
Për të lëvizur në këtë vend, marrja me qira e një makine është thelbësore, me tarifa që nuk i kalojnë 25 euro në ditë. Gjithashtu, ekzistojnë platforma që ofrojnë një sërë opsionesh kur merrni me qira një automjet në Shqipëri.
Shqipëria ka një natyrë të egër, një frymë kulturore mes Lindjes dhe Perëndimit dhe 400 kilometra ujëra blu transparente në detet Jon dhe Adriatik.
Pesë atraksionet turistike më të bukura janë:
Riviera Shqiptare: Me plazhet e saj të pastra kristal dhe qytetet piktoreske bregdetare, Riviera Shqiptare është një parajsë për adhuruesit e diellit dhe plazhit.
Gjirokastra dhe Berati: Këto dy qytete janë vende të Trashëgimisë Botërore të UNESCO-s, të njohura për arkitekturën e tyre osmane të ruajtur mirë dhe kështjellat mbresëlënëse.
Liqeni i Ohrit: Liqeni i Ohrit është një nga liqenet më të vjetër dhe më të thellë në Evropë, i famshëm për bukurinë e tij natyrore dhe biodiversitetin e pasur.
Kryeqyteti, Tirana: Një qytet vazhdimisht në zhvillim, Tirana ofron një ndërthurje unike të historisë, artit urban, gastronomisë dhe jetës së natës.
Parku Kombëtar i Thethit: Ideal për adhuruesit e ecjes dhe natyrës, ky park kombëtar ofron peizazhe mahnitëse, ujëvara dhe fshatra piktoreskë malorë./ata
