Mbrëmja e djeshme nuk ishte e zakonshme për qytetarët kryeqytetas. Sopranoja shqiptare me famë ndërkombëtare, Ermonela Jaho me plot emocione dhe mijëra përjetime u rikthye më fuqishëm se kurrë në skenën e Teatrit Kombëtar të Operas dhe Baletit duke rrëmbyer zemrat e publikut me performancën live.
“Rikthimi i Dallëndyshes” u titullua koncerti lirik i sopranos së mirënjohur shqiptare që u zhvillua edhe me praninë e tenorit të njohur Charles Castronovo, ku së bashku ngritën peshë zemrat e të pranishmëve.
Interesi qytetarëve për të ndjekur nga afër koncertin ishte i lartë, ndaj dhe biletat u shitën në kohë rekord para nisjes së evenimentit.
Për ata qytetarë të interesuar që nuk mundën të siguronin një bilete, Bashkia e Tiranës vendosi një ekran të madh para TKOB-së që artdashësit e muzikës të përjetonin kështu drejtpërdrejtë interpreetimin e sopranos së njohur.
Për artisten shqiptare rikthimi në vendin e saj dhe performimet për publikun shqiptar janë një vlerësim dhe privilegj për të, duke treguar kështu sadopak mirënjohjen që i ka dhënë ky vend.
