Vetëm disa orë pas seancës së posaçme në Kuvend ku Arben Ahmetajt iu hoq imuniteti, opozita ka kërkuar sërish që çështja e inceneratorëve të jetë kryefjalë e seancave plenare.
Përmes një kërkese të firmosur nga deputetët e Rithemelimit, kërkohet që të futet në rend të ditës së seancës së ardhshme mocioni me debat për inceneratorët.
“Futni si çështje të parë në rendin e ditës në seancën plenare të dt 20.7.2023, të mocionit me debat rreth skandalit të inceneratorëve ku nga informacionet e bëra publike, përveç ish zv. kryeministrit Ahmetaj janë të përfshirë edhe ministra të tjerë aktualë, ish-ministra, deputetë e funksionarë të tjerë të lartë” thuhet në kërkesë.
Rithemelimi kërkon nga 10 minuta për çdo deputete që kërkon të diskutojë.
Me 117 vota pro, Kuvendi i hapi sot (14 korrik 2023) rrugë arrestimit të ish zv/ kryeministrit Arben Ahmetaj dhe kontrollit të banesës, ndërsa në orën 15:00 vendimi i Kuvendit mbërriti në SPAK. Hapi i radhës është që SPAK ti drejtohet Gjykatës së Posaçme për të firmosur urdhërekzekutimin për arrestimin e Ahmetajt.
(Kliko këtu për të lexuar dokumentin e plotë)
