Afati për të rivlerësuar pronat do të zgjatet edhe me 4 muaj. Report TV ka mësuar se shtyrja e afatit do të miratohet nga Këshilli i Ministrave. Burime nga Ministria e Drejtësisë bëjnë të ditur se rivlerësimi i pronave shtyhet për tre arsye kryesore.
Së pari propozimi për shtyrje vjen si pasojë e pandemisë dhe vështirësive që ka krijuar në qarkullimin e qytetarëve. Së dyti për shkak se emigrantët nuk kanë përfituar pasi kanë qenë të penguar prej kufizimeve të shkaktuara nga pandemia COVID-19.
Së treti është problemi i legalizimeve, që t’ju jepet mundësia e përfitimit edhe atyre që kanë legalizuar shtëpitë e tyre së fundmi.
Ndërkohë për të shtyrë procesin e rivlerësimit sipas burimeve ka dakordësi mes institucioneve. Tatimi për të rivlerësuar pronat është 3%, nga 15% që është tatimi normal që paguhet në rast se shet pronat.
Në total deri në fillim të këtij muaji kishin aplikuar për të kryer rivlerësimin e pronave 56,623 qytetar, dhe ishin arkëtuar në nga ky proces 30,6 milionë euro. Synimi i ligjit ishte që të rivlerësoheshin në total 50 mijë pasuri të paluajtshme dhe të arkëtoheshin rreth 49.8 milionë euro.
Ligji për rivlerësimin e pasurisë së paluajtshme ka hyrë në fuqi në 1 janar 2020, dhe afati përfundimtar për tu mbyllur është 31 dhjetori 2021.
//ReportTv.al