Kuvendi i ri, që pritet të konstituohet brenda 2 javësh, mes të tjerash duhet ta nisë punën me zgjedhjen e 5 anëtarëve të rinj të KQZ-së. Komisionit Rregullator i mbaron mandati më 5 tetor, dhe trupa duhet rinovuar, në kushtet kur të paktën 3 bashki, Mati, Tepelena dhe Berati po bëhen gati për zgjedhje të reja për kryetarët e bashkive, që pritet të mbahen në gjysmën e parë të tetorit.
***
Komisioni Rregullator, një prej tre shtyllave të KQZ-së, përfundon mandatin më 5 tetor. Bëhen 5 vite nga dita kur Kuvendi zgjodhi trupën me 5 anëtarë, 3 të propozuar nga Partia Socialiste (Ilirjana Nano, Dritan Çaka, Arens Çela), një propozim nga Partia Demokratike (Helga Vukaj) dhe një propozim nga LSI-ja (Muharrem Çakaj).
I takon Kuvendit të ri, që menjëherë sapo të nisë punën, të hapë garën dhe të zhvillojë procesin e rinovimit të kësaj pjese të KQZ-së.
Kjo bëhet më e rëndësishme, teksa pritet që të paktën 3 bashki në vend të shkojnë në zgjedhje të parakohshme, ku roli i Komisionit Rregullator është i domosdoshëm.
Bashkitë Mat, Tepelenë dhe Berat i dërguan kryebashkiakët e tyre në Kuvend si deputetë, dhe pas dorëheqjes së Agron Malajt, Tërmet Peçit dhe Ervin Demos, po drejtohen përkohësisht nga nënkryetarët e bashkive.
Tashmë që KQZ mbaroi punë me 11 majin duke bërë dhe certifikimin përfundimtar të zgjedhjeve, lëvizjet e koordinuara mes qeverisë dhe Komisionit, parashikojnë që Kryeministria të njoftojë zyrtarisht Presidentin se në këto 3 bashki ka vakanca.
Pas këtij momenti, Bajram Begaj, është i detyruar sipas ligjit të shpallë një datë zgjedhjesh jo më herët se 30 ditë dhe jo më vonë se 45 ditë. Palët politike presin që data e re e zgjedhjeve të jetë 5 ose 12 tetori, dy të dielat e para të këtij muaji, edhe pse duket se data e zhvillimit të zgjedhjeve në këto tre bashki, duket se do të jetë në vullnetin e Edi Ramës.
Komente
