Lojtari i Lyonit, Houssem Aouar, vendosi të luajë për kombëtaren e Algjerisë në fillim të janarit, edhe pse pati një paraqitje në një ndeshje miqësore për Francën.
Ndërkohë, Aouar, ka filluar t’i shqetësojë drejtuesit e Lyonit për praktikimin e fesë islame.
Gjegjësisht, sipas shkrimeve të gazetarit të besueshëm francez Romain Molina, drejtuesit e Lyonit i shqetëson fakti që Aouar kohëve të fundit e praktikon intensivisht fenë e tij. Madje kanë frikë nga radikalizimi i tij.
“Në lidhje me paranojën e klubit, ka një anekdotë. Aouar rriti mjekër dhe shkoi në Mekë. Keni djem në klub që thonë me vete: “O la la, a nuk do të radikalizohej atje?”. Si dëshironi që lojtarët të ndihen mirë më pas”, ka thënë Molina.
Megjithatë, trajnerit Laurent Blanc nuk i intereson shumë kjo. Aouar nuk është në planet e tij për shkak se kontrata e tij deri në fund të qershorit nuk është zgjatur ende dhe Milani dhe Roma e kanë ndjekur prej kohësh.
Aouar ka qenë një nga lojtarët më të mirë të klubit në sezonet e fundit dhe prej tij pritej një transferim i madh.
