BERAT- Mesditën e sotme, banesa e dy vëllezërve Artan dhe Afrim Jaze në fshatin Molisht u përfshi nga flakët për shkak të goditjes nga rrufeja. Në banesë është arritur të shpëtohet një vlerë prej 20 mijë eurosh, e cila u gjet nga zjarrfikësit në sirtarin e një komodine,e ruajtur aty prej familjarëve.
Mësohet se në momentin kur rrufeja ka goditur shtëpinë, njëra prej familjeve të dy vëllezërve ndodhej brenda në banesë, ndërsa tjetra ndodhet në emigracion. Në momentin kur banesa u përfshi nga flakët familjarët dolën menjëherë nga shtëpia duke mos arritur të merrnin as shumën e parave.
Rrufeja ka goditur fillimisht majën e çatisë, për shkak se ajo përbëhej me element hekuri e druri, flakët kanë përpirë çatinë, pas kësaj, kabujt elektrik të amortizuar kanë përhapur zjarrin në dy banesat të cilat ndodheshin nën një çati. Forcat e repartit zjarrfikës janë munduar të shuajnë zjarrin për të shpëtuar atë pjesë të padjegur të banesave të vëllezërve Afrim dhe Artan Jaze.
