Me një përshkrim plot ngjyra, media gjermane RTL Radio i ka kushtuar një artikull turizmit në Shqipëri, nga mali në det. Reportazhi veçon bjeshkët shqiptare, plazhet e rivierës si në Maldive, por edhe Tiranën e gjallë.
Muzetë Bunk’art - shkruhet në artikull, - e tregojnë historinë e komunizmit në një mënyrë vizuale mahnitëse.
Jehonës që ka lënë pas ky shkrim i ka kushtuar mëngjesin e sotëm edhe një postim në rrjetin social Facebook kryeministri Edi Rama.
“Shqipëria-Nga Alpet në Rivierë, një udhëtim që të mbetet në zemër. RTL Radio në serinë e saj për destinacionet e pushimeve në Europë ka ndaluar në Shqipëri - “xhevahiri ballkanik” që po kthehet nga një sekret, në destinacion qendror të hartës turistike europiane.
Nga Alpet e Shqipërisë, deri në Dhërmi, Ksamil e Himarë, duke kaluar përmes Parkut Kombëtar të Vjosës dhe qyteteve UNESCO si Gjirokastra e Berati, kjo guidë e plotë u ofrohet pushuesve europianë për pushimet e tyre në Shqipërinë tonë”, shkroi Rama.
Artikulli i plotë:
Nga Alpet Shqiptare në bregdetin Jon, kjo perlë e Ballkanit po bëhet një nga vendet më joshëse për t'u arratisur në Evropë. Në këtë kapitull të tretë, do njihemi me Shqipërinë, një vend i cili ndodhet në një pikë kulmore në hartën e pushimeve të Evropës.
Natyrë e paprekur në veri
Vendi ofron një larmi të jashtëzakonshme në një zonë të vogël, me natyrë shumë larg turizmit masiv. Në veri, në kufirin me Kosovën dhe Malin e Zi, shtrihen të ashtuquajturat 'Malet e Nemuna' ose Alpet Shqiptare. Rajonet e Valbonës dhe Thethit ofrojnë shtigje ecjeje përmes peizazheve spektakolare malore.
Fshatrat e vegjël me shtëpi guri, lumenj të pastër dhe pamje panoramike e bëjnë zonën një parajsë për ata që pëlqejnë aktivitetet në natyrë dhe ata që kërkojnë paqe.
Parku Kombëtar i Vjosës, i klasifikuar në vitin 2023 si 'Parku Kombëtar i Lumit të Egër' i parë në Evropë, ofron edhe më shumë bukuri natyrore. Vjosa konsiderohet si lumi i fundit i madh me rrjedhë të lirë në kontinent, me rajonin përreth që është shtëpia e mbi 1,100 llojeve të kafshëve dhe bimëve, duke përfshirë rrëqebullin, vidrat dhe zogj të rrallë. Zona monitorohet dhe mbrohet në mënyrë strikte.
Riviera - plazhe si ato të Maldiveve
Ata që preferojnë detin në vend të maleve nuk do të zhgënjehen gjithashtu. Riviera Shqiptare përgjatë bregdetit Jon është një nga rajonet më të bukura. Plazhet e Ksamilit, Dhërmiut dhe Himarës kanë rërë të imët, ujëra ngjyrë bruz dhe një atmosferë mahnitëse - pa turmat e resorteve të mëdha.
Që nga vera e vitit 2024, vija bregdetare është bërë më e shkurtër falë Tunelit të Llogarasë, një projekt i madh infrastrukturor që përmirëson lidhjen midis maleve dhe detit. Udhëtimi nëpër këtë rrugë, dikur të rrezikshme, është reduktuar nga 30 minuta në vetëm shtatë, duke nxitur turizmin rajonal.
Jeta urbane
Kryeqyteti, Tirana, përzien ngjyrat, historinë dhe jetën e gjallë të qytetit. Qendra e tij është plot me energji krijuese, nga kafenetë me muzikë live dhe art rruge te restorantet inovative dhe një popullsi e re që i jep jetë qytetit.
Tirana përballet gjithashtu hapur me të kaluarën e saj. Muzeumet Bunk'Art 1 dhe Bunk'Art 2, të vendosura në bunkerë nëntokësorë nga epoka e diktaturës, tregojnë historinë e komunizmit në një mënyrë vizuale mahnitëse.
Kultura dhe perlat historike
Trashëgimia kulturore e Shqipërisë është po aq e pasur. Në veriperëndim shtrihet Shkodra, një nga vendbanimet më të vjetra në rajon, e vendosur pranë liqenit më të madh në Ballkan. Kalaja e Rozafës ‘mbikëqyr’ qytetin me pamje gjithëpërfshirëse të ujit, maleve dhe lumit.
Më në jug, qytetet e Trashëgimisë Botërore të UNESCO-s, Berati, 'qyteti i një mijë dritareve', dhe Gjirokastra, e njohur për arkitekturën osmane dhe shtëpitë prej guri, ofrojnë pamje autentike dhe të gjalla të traditave dhe identitetit të Shqipërisë.
Edhe pse ende nuk është pjesë e Bashkimit Evropian, Shqipëria pranon euro në shumë restorante dhe dyqane. Monedha kombëtare është leku, por turistët shpesh nuk kanë nevojë të shkëmbejnë para.
Shqipëria ofron natyrë spektakolare, mikpritje të ngrohtë, kulturë të pasur dhe një Rivierë që mund të konkurrojë me destinacione më të njohura. Qoftë duke bërë ecje në male, duke u çlodhur pranë detit apo duke eksploruar qytete historike, ajo mbetet një destinacion i përkyer për të gjithë./ RTL Radio
Komente
