Mbështetësit e politikanit rumun të së djathtës ekstreme, Calin Georgescu, u ndeshën kundër policisë të dielën jashtë autoritetit qendror të zgjedhjeve, duke brohoritur dhe valëvitur flamuj ndërsa lajmet u përhapën se ai ishte ndaluar të kandidojë në një rivotim të zgjedhjeve presidenciale të anuluara të vendit.
Reuters thotë se refuzimi i kandidaturës së Georgescu, i cili u kundërshtua nga krerët e partisë së ekstremit të djathtë si jodemokratik, pritet të kundërshtohet në gjykatën kushtetuese të vendit.
Gjykata më e lartë e Rumanisë anuloi votimin e dhjetorit dy ditë përpara raundit të dytë të votimit duke përmendur akuzat për ndërhyrje ruse në favor të Georgescu, të cilat Moska i ka mohuar.
Anëtarët e administratës së presidentit amerikan Donald Trump i quajtën zgjedhjet e anuluara një shembull të qeverive evropiane që shtypin lirinë e fjalës dhe kundërshtarët politikë.
Georgescu tha në një postim në Facebook se vendimi nënkuptonte se Rumania ishte "nën tirani" ndërsa miliarderi dhe këshilltari i Trump, Elon Musk e quajti vendimin e autoritetit zgjedhor "të çmendur" në platformën e tij të mediave sociale, X.
Georgescu është nën hetim penal për gjashtë akuza, duke përfshirë anëtarësimin në një organizatë fashiste dhe komunikimin e informacionit të rremë rreth financimit të fushatës. Ai ka mohuar të gjitha keqbërjet
Komente
