Rusia kërkon heqjen e disa sanksioneve perëndimore para se të nisë armëpushimi detar me Ukrainën. Moska kërkon revokimin e sanksioneve ndaj bankës shtetërore bujqësore Rosselkhozbank dhe rivendosjen e aksesit të firmave në sistemin ndërkombëtar të pagesave Swift.
BE dhe aleatët e saj pezulluan aksesin në Swift për një sërë institucionesh financiare ruse pas nisjes së luftës në Ukrainë. Qëllimi ishte që kompanitë ruse të humbnin aksesin në transaksionet normale të ofruara nga Swift, duke ndërprerë pagesat për eksportet e saj të vlefshme të energjisë dhe bujqësore.
Por për heqjen e sanksioneve do të duhet miratimi nga BE, një hap që do të dukej i pasigurt në dritën e deklaratave të fundit evropiane për mbështetjen e Kievit.
Të martën, presidenti amerikan Donald Trump tha se Rusia mund të përpiqet të vonojë përfundimin e luftës.
"Unë mendoj se Rusia dëshiron të shohë një fund të saj, por mund të jetë se ata po zvarriten. Unë e kam bërë këtë gjatë viteve," tha ai.
Armëpushimi detar u njoftua nga SHBA pas tre ditësh bisedime paqeje në Arabinë Saudite.
Komente
