Për ambasadorin rus në Bosnje-Hercegovinë, Igor Kalabukhov, rezoluta për gjenocidin e Srebrenicës që do të votohet më 23 maj në Asamblenë e Përgjithshme të OKB-së është një provokim i madh që synon të destabilizojë situatën dhe të pengojë procesin e paqes në Bosnje-Hercegovinë.
I cituar nga mediat rajonale, diplomati iu drejtua udhëheqësve politikë të perëndimit, veçanërisht anglo-saksonëve, të cilët kërkojnë të imponojnë narrativën sipas së cilës vetëm boshnjakët myslimanë ishin viktimat e vetme të konflikteve të armatosura të viteve 1990 në Ballkan, dhe se vetëm Perëndimi mund t'i mbrojë ata dhe të jetë në anën e tyre.
Por gjërat nuk janë kështu, tha ambasadori. Në vitin 2015, Rusia me veton e saj pengoi miratimin në Këshillin e Sigurimit të një rezolute për gjenocidin e Srebrenicës të propozuar nga Londra me rastin e 20-vjetorit të masakrës në korrik 1995 të mbi 8,000 civilëve myslimanë boshnjakë në qytetin lindor të Bosnjës nga trupat serbo-boshnjake të Ratko Mlladiç .
Një masakër e cila është klasifikuar si gjenocid nga drejtësia ndërkombëtare. Sipas serbëve dhe serbëve të Bosnjës, vendimi për të votuar një rezolutë të re për këtë çështje në Asamblenë e Përgjithshme dhe jo në Këshillin e Sigurimit (një vendim që konsiderohet i paligjshëm pasi Këshilli i Sigurimit merret me çështje të tilla) është marrë për të shmangur një veto të re të Moskës. Për palën serbe, të mbështetur nga Rusia, në Srebrenicë nuk ka pasur gjenocid por krime mizore të kryera për të cilat përgjegjësia duhet t'i ngarkohet individëve, dhe jo kolektivisht një populli të tërë.
Xh.K/ReportTv.al![](https://www.report-tv.al/template/img/antipiracynote.jpg)