Politikë

Samiti i Komunitetit Politik Europian në 16 maj/ Rama: Krenari që në zemër të Tiranës do të bëhen bashkë liderët e të gjithë kontinentit

Kryeministri Rama thotë se është krenari që më 16 maj në zemër të Tiranës do të mbahet Samiti i Komunitetit Politik Evropian, i cili do të mbledhë të gjithë liderët e kontinentit. Për kreun e qeverisë, fakti që Shqipëria është zgjedhur për të mbajtur samitin, tregon respektin dhe besimin që ka fituar ndërkombëtarisht. 

9 Prill, 07:51| Përditesimi: 9 Prill, 15:14

  • Share

Më 16 maj, mbahet në Tiranë Samiti i Komunitetit Politik Evropian. Kryeministri Edi Rama e cilëson këtë si një krenari që në zemër të Tiranës do të mblidhen liderët e të gjithë kontinentit evropian. Kreu i qeverisë ka ndarë një video, e cila nis me një fjalë të presidentit francez Emmanuel Macron. 

“Kjo organizatë e re evropiane do t’u mundësonte kombeve demokratike evropiane që i përmbahen vlerave tona thelbësore të gjejnë një fushë të re bashkëpunimi politik, sigurie, bashkëpunimi në energji, transport, investime, infrastrukturë, lëvizje të njerëzve dhe veçanërisht të të rinjve tanë”, thotë Macron.

Rama thotë përmes videos se arsyeja që Shqipëria u përzgjodh për të zhvilluar këtë ngjarje të rëndësishme është fakti se tashmë shihet me respekt dhe vlerësim. 

"Mirëmëngjes dhe me krenarinë për faktin se në 16 maj, do të bëhen bashkë në zemër të Tiranës për Samitin e Komunitetit Politik Europian, liderët e të gjithë kontinentit tonë të demokracive, nga Londra në Kiev e nga Oslo në Ankara, ju uroj një ditë të mbarë", shkruan Rama.

Samiti do të jetë një mundësi për Shqipërinë që të tregojë angazhimin e saj për avancimin në procesin e integrimit dhe të forcimit të institucioneve demokratike. Po ashtu, është një mundësi për të diskutuar mbi të ardhmen e rajonit dhe për të thelluar bashkëpunimin me vendet e tjera të Komunitetit Politik Europian.
 
Samiti i mëparshëm i Komunitetit Politik të Evropës u mbajt në Budapest më 7 nëntor, në drejtimin e kryeministrit hungarez Viktor Orban. 

Xh.D/ReportTv.al
Komento

Komente

  • Sondazhi i ditës:

    Fushata për 11 majin, a i besoni premtimet e partive politike?