Presidenti i Ukrainës, Volodymyr Zelensky thotë se lëshimet territoriale nuk do ta bindnin Rusinë që të ndalonte luftën. Ai kërkoi presion më të madh global ndaj Moskës, duke shtuar se po e zvarrit përfundimin e luftës.
"Rusia po e zvarrit luftën dhe për këtë arsye meriton një presion më të madh global. Rusia refuzon të ndalojë vrasjet dhe për këtë arsye nuk duhet të marrë shpërblime ose përfitime. Dhe ky nuk është vetëm një qëndrim moral, është racional. Lëshimet nuk e bindin një vrasës. Por mbrojtja vërtet e fortë e jetës i ndal vrasësit.", tha ai.
"Falënderoj të gjithë në mbarë botën që na ndihmojnë të qëndrojmë të fortë dhe që na sjellin më afër paqes së vërtetë: paqes përmes forcës. Ky është i vetmi lloj paqeje që mund të arrihet me Rusinë", shtoi Zelensky.
Më herët, teksa po flitet se mes Donald Trump dhe Vladimir Putin do të diskutohet edhe për shkëmbim territoresh si një mënyrë për të arritur një armëpushim, Zelensky deklaroi se nuk do të lejojnë që pushtuesit t’u marrin tokën.
Komente
