Kryetari i partisë Demokratike, Sali Berisha, prezantoi sot edhe programin elektoral për Sportet, në një takim që pati me strukturat dhe sportistët.
Edhe pse gjatë qeverisjes 2005-2013 pati kohë tetë vite për të realizuar premtimet e sportit me shpërblime dhe buxhet, ai iu rikthye premtimit për t’i bërë “sportet madhështore”.
Kreu i selisë blu deklaroi se do të zhbëjë ligjin e sponsorizimeve të qeverisë së Edi Ramës, duke e cilësuar të padrejtë dhe me natyrë mafioze.
Gjithashtu u shpreh se sportistët që fitojnë çmime dhe tituj për Shqipërinë nuk do vlerësohen me me grada e spaleta kolonelësh apo kapitenësh, por me shpërblime. Ai theksoi se “nuk do ketë më militarizim të sportit”.
“Degët e sportit do të gjejnë mbështetje, stimuj, jo duke i shpallur kapitenë apo kolonelë me spaleta, por duke u shpërblyer pa i militarizuar ata apo ato për të gjithë meritën që kanë”. Do ketë propocion mes sporteve për vlerësimin dhe shpërblimin, edhe pse futbolli mbetet sporti më popullor e masiv”.
Ndërsa nënvizoi se PD do dyfishojë buxhetin për sportet, ai njoftoi edhe zhbërjen e ligjit të sponsorizimeve, i propozuar edhe nga strukturat përkatëse.
“Artani ka bërë disa sugjerime shumë të drejta për ligjin e sponsorizimeve. Ai ligj do amendohet plotësisht dhe do përshtatet për t’i hapur të gjithë hapësirën e nevojshme që investitorë të mund të investojnë, të bashkëinvestojnë në klube private, në forma të ndryshme. Pra, të rriten njëlloj si në vendet me sport më të avancuar, burimet financiare për sportin dhe sport. Të punojmë së bashku për një Shqipëri Madhështore, e cila nuk mund të jetë kurrë e tillë pa një sport madhështor”, tha ai mes të tjerash.
Komente
