Pas tre muajsh nga rënia e strehimores në stacionin hekurudhor, ku humbën jetën 15 persona, studentët dhe qytetarët e Novi Sadit kanë përfunduar bllokadën e Ura e Lirisë, e cila ka zgjatur 27 orë.
Bllokada ka përfunduar në orën 18:00, ndërsa filloi dje (1 shkurt 2025) në ora 15:00. Studentët sqaruan se zgjatja e bllokadës me 3 orë kishte të bënte me pastrimin e zonës ku ata qëndruan për 24 orë.
Dhjetra fermerë parkuan traktorët e tyre pranë Urës së Lirisë, duke thënë se donin t'i ruanin studentët nga incidentet dhe sulmet e mundshme nga simpatizantët e presidentit të Serbisë, Aleksandër Vuçiç. Banorët e Novi Sadit u sollën çaj dhe kafe, petulla, pasta dhe ushqime të gatuara në shtëpi.
Studentët besojnë se incidenti i ndodhur më 1 nëntor 2024 në Novi Sad është pasojë e korrupsionit qeveritar në një projekt të madh infrastrukturor me një kompani shtetërore të Kinës.
Në nisje të protestës më 1 shkurt, protestuesit kanë bllokuar për tri orë edhe dy urat tjera të Novi Sadit, Varadin dhe Zhezhel.
Në mbrëmjen e së shtunës, figura të njohura publike dhe kulturore kanë folur para protestuesve. Protestuesit kanë qëndruar në afërsi të urës, nga frika se ajo mund të mbingarkohej.
Studentëve në Novi Sad u janë bashkuar edhe kolegët e tyre prej Beogradit, të cilët kanë ecur për dy ditë prej kryeqytetit. Në protestë ka pasur edhe qytetarë prej rajoneve tjera të Serbisë.
Prej incidentit të 1 nëntorit në Serbi, mijëra njerëz kanë protestuar rregullisht nëpër rrugë.
Protestat e vazhdueshme kanë rezultuar me dorëheqjen e kryeministrit serb, Millosh Vuçeviç, më herët gjatë javës, dhe një mori koncesionesh të bëra nga Qeveria populiste, e cila bën përpjekje të qetësojë rezistencën.
Megjithatë, studentët kanë insistuar se do ta vazhdojnë protestën deri në realizim të kërkesave të tyre.
Kërkesat e studentëve për ndalimin e bllokadave përfshijnë publikimin e dokumentacionit të plotë për rindërtimin e stacionit hekurudhor të Novi Sadit, për të përcaktuar përgjegjësinë për aksidentin e 1 nëntorit, 2024.
Ata gjithashtu kërkojnë që sulmuesit e demonstruesve nëpër Serbi, gjatë protestave që pasuan aksidentin, të identifikohen dhe të përballen me përgjegjësi penale.
Kërkesat përfshijnë edhe lirimin e aktivistëve të arrestuar gjatë protestave, ndalimin e procedurave penale kundër tyre, si dhe rritjen e buxhetit për universitetet.
Autoritetet, në anën tjetër, pretendojnë se i kanë plotësuar të gjitha kërkesat.
Pas tre muajsh nga rënia e strehimores në stacionin hekurudhor, ku humbën jetën 15 persona, studentët dhe qytetarët e Novi Sadit kanë përfunduar bllokadën e Ura e Lirisë, e cila ka zgjatur 27 orë. Bllokada ka përfunduar në orën 18:00, duke filluar dje në ora 15:00.
Komente
