Protestat kundër qeverisë së Aleksandër Vuçiç vazhduan edhe mbrëmjen e së shtunës në disa qytete të Serbisë, përfshirë Beogradin. Në Valjevo, u shënuan incidente pasi protestuesit sulmuan mabientet e Partisë Progresive Serbe (SNS), ndërsa policia përdori granata tymuese dhe gaz lotsjellës për t'i larguar.
Në këtë qytet, u sulmua edhe ndërtesa e Administratës së Qytetit si dhe ajo e Prokurorisë Lokale. Protestuesit thyen gjithashtu dritaret e selisë së Partisë Radikale Serbe (SRS), një partner i koalicionit të SNS-së. Në Novi Sad, u hoqën flamujt e partisë në ambientet e SNS-së dhe i vunë flakën.
Vuçiç iu përgjigj zhvillimeve të së shtunës, duke thënë se “dhuna është një shprehje e dobësisë totale” dhe duke premtuar se do të “ndëshkojë ngacmuesit”. Ai ka hedhur poshtë vazhdimisht thirrjet për zgjedhje të parakohshme dhe i ka denoncuar demonstratat si pjesë të një komploti të huaj për ta rrëzuar atë.
Protestat në Serbi kanë vazhduar që nga nëntori i kaluar, që nga shembja e tendës në stacionin hekurudhor në Novi Sad, ku humbën jetën 16 persona. Demonstratat e udhëhequra nga studentët kanë qenë kryesisht paqësore deri më tani. Ato u mbajtën në të gjithë vendin dhe tërhoqën deri në disa qindra mijëra njerëz.
Situata u përshkallëzua këtë javë kur grupe mbështetësish të qeverisë, shpesh të maskuar, sulmuan protestuesit.
Të dyja palët akuzojnë njëra-tjetrën për provokime që synojnë përshkallëzimin e situatës.
Komente
