Ish-asistenti i Chelseat, Luca Gotti u emërua trajneri i ri i Leçes këtë të mërkurë, dy ditë pasi Roberto D'Aversa u shkarkua pasi goditi me kokë një lojtar kundërshtar.
Gotti ishte asistent i Maurizio Sarrit te Chelsea në sezonin 2018-19 dhe së fundmi ka qenë trajneri kryesor te Udinese dhe Spezia po në Serie A. Leçe shpjegoi se Gottit i është dhënë një kontratë deri në fundin e sezonit që do të zgjatet nëse klubi italian shmang rënien në Serie B.
D'Aversa humbi kontrollin në fund të humbjes 1-0 të së dielës në shtëpi ndaj Hellas Veronas. Sulmuesi i Veronas, Thomas Henry po debatonte me mbrojtësin e Leçes, Marin Pongracic pas fërshëllimës së fundit, kur D'Aversa shkoi për të ndërhyrë, por në vend të kësaj përfundoi duke e rrëzuar Henrin me një goditje të dukshme me kokë direkt përpara një prej zyrtarëve të ndeshjes.
Përveç shkarkimit, D'Aversa u dënua me katër ndeshje që do t'i vuajë nëse do të punësohet nga një klub tjetër. Leçe qëndron një pikë mbi zonën e rënies pas një fillimi mbresëlënës të sezonit kur ishte i pamposhtur pas pesë ndeshjesh. Debutimi i Gottit do të jetë kundër vendit të fundit, Salernitanës, të shtunën.
Kujtojmë se pjesë e Leçes janë edhe dy lojtarët e Kombëtares, Ylber Ramadani dhe Medon Berisha.
