TIRANË- Nxënëset e kolegjit turk “Mehmet Akif” kanë dalë sërish në protestë ditën e sotme pasi shkolla e tyre u mbyll me vendim qeverie për shkak të shkeljeve ligjore.
Ato u mblodhën përpara Kryeministrisë teksa vazhdojnë të kundërshtojnë vendimin e qeverisë për mbylljen e kolegjit.
Qeveria ka lënë një afat 3 javor që të lirohen ambientet e shkollës, ndërsa përfaqësuesit e kolegjit turk thonë se do ta hedhin në gjyq çështjen.
Kjo është dita e katërt e protestës, ndërsa dhe më herët, nxënësit e kolegjit turk Mehmet Akif kanë kundërshtuar vendimin e qeverisë për heqjen e licencës,pasi godina e re në Mëzes nisi mësimin pa u certifikuar nga ministria. Drejtori turk i kolegjit hodhi dyshime se kjo bëhet për shkak të kërkesave të përsëritura nga Erdogan, ndërsa ministria e Arsimit i mohoi këto aludime duke marrë përsipër edhe transferimin e nxënësve në shkolla të tjera.
