Asnjë vizë për delegacionin palestinez në Asamblenë e Përgjithshme të OKB-së. Administrata Trump po përshkallëzon përplasjen me Autoritetin e udhëhequr nga Mahmoud Abbas, i cili nuk do të mund të mbajë fjalimin e zakonshëm në selinë e OKB-së.
Justifikimi zyrtar i Departamentit të Shtetit është mungesa e një qëndrimi të fortë kundër Hamasit, pas sulmit të 7 tetorit, dhe madje inkurajimi i islamistëve për të refuzuar negociatat. Ai jozyrtar është se Uashingtoni dëshiron të shmangë përdorimin e Asamblesë së ardhshme të Përgjithshme, që do të nisë më 23 shtator, për iniciativa mbi njohjen e shtetit palestinez. Por, nëse objektivi afatgjatë është të pengohet Hamas të rikthehet në qeverisje në Gaza apo të ketë çfarëdo roli politik, kështu po delegjitimohet alternativa e vetme që mund të ishte në gjendje ta zëvendësonte.
"Administrata Trump", thuhet në komunikatën e Departamentit të Shtetit, ka qenë e qartë: është në interesin tonë për sigurinë kombëtare të mbajmë përgjegjëse Organizatën për Çlirimin e Palestinës (PLO) dhe Autoritetin Palestinez për mosrespektimin e angazhimeve të tyre dhe për minimin e perspektivave të paqes". Dhe shton: "Përpara se PLO dhe AP të mund të konsiderohen partnerë për paqe, duhet të heqin dorë sistematikisht nga terrorizmi – përfshirë masakrën e 7 tetorit – dhe të ndalin nxitjen e terrorizmit në arsim, siç kërkohet nga ligji amerikan dhe siç e ka premtuar PLO-ja".
Por ka edhe më shumë: "AP duhet gjithashtu të ndalë përpjekjet e saj për të anashkaluar negociatat përmes fushatave të drejtësisë ndërkombëtare, përfshirë apelimet në Gjykatën Penale Ndërkombëtare dhe në Gjykatën Ndërkombëtare të Drejtësisë, si dhe përpjekjet për të marrë njohjen e njëanshme të një shteti të supozuar palestinez. Të dyja këto masa kanë kontribuar konkretisht në refuzimin e Hamasit për të liruar pengjet dhe në prishjen e bisedimeve për armëpushim në Gaza".
Uashingtoni sqaron se "Misioni i Autoritetit Palestinez pranë Kombeve të Bashkuara do të marrë përjashtime në bazë të Marrëveshjes për selinë e OKB-së, e cila rregullon praninë e e OKB-së në SHBA". Deklarata përfundon: "Shtetet e Bashkuara mbeten të hapura për një angazhim të ri, që të jetë në përputhje me ligjet tona, nëse AP/PLO respekton detyrimet e veta dhe ndërmerr masa konkrete për t’u rikthyer në një rrugë konstruktive kompromisi dhe bashkëjetese paqësore me shtetin e Izraelit".
Dje Trump gjithashtu bllokoi 4,9 miliardë ndihma ndërkombëtare, mes tyre 520 milionë për financimin e OKB-së dhe 838 për misionet e paqes.
Zëdhënësi i sekretarit të përgjithshëm Guterres, Stéphane Dujarric, iu përgjigj kështu pyetjes nëse bllokimi i vizave shkel Marrëveshjen mbi selinë e OKB-së: "Do ta diskutojmë me Departamentin e Shtetit. Ne besojmë se të gjitha vendet anëtare duhet të pranohen".
Ambasadori palestinez në OKB, Riyad Mansour komentoi: "Do të shohim saktësisht çfarë do të thotë masa dhe si zbatohet për delegacionin tonë, pastaj do të përgjigjemi në mënyrë të përshtatshme". Mansour duhet të ketë mundësinë të ndërhyjë në Asamble në emër të AP-së, por nuk është e sigurt nëse Abbas do të mund të vijë.
Disa vende, duke filluar nga Franca dhe Britania e Madhe, kanë shpallur synimin për të njohur shtetin palestinez në Asamblenë e ardhshme, dhe Abbas synonte të paraqiste një “deklaratë kushtetuese” për shpalljen e pavarësisë. Manovra që SHBA-ja dëshiron t’i bllokojë, edhe me koston e dobësimit të alternativave ndaj Hamasit.
Të mërkurën Trump kishte pritur një takim mbi periudhën pasluftës në Gaza, ku morën pjesë i dërguari i posaçëm Steve Witkoff, dhëndri Jared Kushner, ish-kryeministri britanik Tony Blair dhe ministri izraelit për Çështje Strategjike Ron Dermer. Ai tha se nuk ishte kundër operacioneve ushtarake në vijim, por kërkoi që ato të përfundonin shpejt. Plani i diskutuar parashikon që Gaza të shndërrohet në një qendër tregtare dhe turizmi, por pa deportuar banorët palestinezë./La Repubblica
Komente
Amerika tashme eshe nje shtet terrorist si vllezrit e tyre israelian por shyqyr po hup fuqine qe ka ne bote
Përgjigju