SHBA dhe vendet e G7 kanë rënë dakord të mbështesin propozimin që përjashton disa kompani amerikane nga disa komponentë të një marrëveshjeje ekzistuese globale për taksat. Lajmi u bë i ditur në një deklaratë zyrtare të publikuar të shtunën nga Kanadaja, e cila mban presidencën aktuale të radhës së G7-ës.
Grupi ka krijuar një sistem të quajtur “krah për krah“ pasi administrata amerikane ra dakord për të hequr propozimin e taksave hakmarrëse në nenin 899 nga projektligji i taksave dhe shpenzimeve të presidentit Donald Trump. Sipas G7, plani njeh ligjet ekzistuese të taksave minimale të SHBA-së dhe synon të sjellë më shumë stabilitet në sistemin ndërkombëtar të taksave.
“Marrëveshja e sotme ofron sigurinë dhe stabilitetin e nevojshëm për ato biznese pasi ato kishin ngritur shqetësimet e tyre”, tha ministrja e Financave Rachel Reeves në një deklaratë, duke shtuar se nevojitet më shumë punë për të trajtuar planifikimin dhe shmangien agresive të taksave.
Bizneset në Mbretërinë e Bashkuar gjithashtu kursehen nga taksat më të larta pas heqjes së nenit 899 nga projektligji i taksave dhe shpenzimeve i Presidentit Donald Trump.
Zyrtarët e G7 thanë se mezi presin të diskutojnë një zgjidhje që është "e pranueshme dhe e zbatueshme për të gjithë".
Në janar, nëpërmjet një urdhri ekzekutiv, Trump deklaroi se marrëveshja globale e taksës minimale të korporatave nuk ishte e zbatueshme në SHBA, duke u tërhequr në mënyrë efektive nga marrëveshja historike e vitit 2021 e negociuar nga administrata Biden me gati 140 vende.
Ai u zotua gjithashtu të vendoste një taksë hakmarrëse kundër vendeve që vendosin taksa mbi firmat amerikane sipas marrëveshjes globale të taksave të vitit 2021. Kjo taksë u konsiderua e dëmshme për shumë kompani të huaja që operonin në SHBA.
Komente
