Një gjykatës federal ka vendosur të kufizojë përkohësisht qasjen e Departamentit të Efiçencës (Doge), i drejtuar nga Elon Musk, në sistemin e pagesave të Thesarit të SHBA-së.
Sipas raportimeve, ekipi i miliarderit ishte përpjekur të hynte në këtë sistem për të bllokuar pagesat e USAID-it, Agjencisë Amerikane për Zhvillim Ndërkombëtar, si dhe pagesat e Medicaid-it, programit federal që mbulon sigurimin shëndetësor për të moshuarit, personat me aftësi të kufizuara dhe shtresat në nevojë.
Vendimi u mor nga gjykatësja Colleen Kollar-Kotelly, e cila lëshoi një urdhër kufizues pasi Musk deklaroi se ekipi i tij po "mbyllte me shpejtësi" disa operacione të Thesarit. Kjo erdhi pasi ata kishin siguruar qasje në sistemin që menaxhon rreth 6 trilionë dollarë në vit, përfshirë pagesat për Sigurimet Shoqërore dhe Medicare.
Ankesa në gjykatë u bë nga punonjësit federalë, të cilët akuzuan Departamentin e Thesarit për ndarjen e të dhënave të tyre personale me Doge. Ky është pengesë e parë ligjore për Elon Musk në fushatën e tij për të reduktuar shpenzimet publike.
Pavarësisht garancive nga qeveria amerikane se vetëm dy përfaqësues të Doge-s – Tom Krause, CEO i Cloud Software Group, dhe programuesi 25-vjeçar Marko Elez – kishin qasje në sistem, gjykatësja vendosi të ndalojë përkohësisht ndarjen e çdo informacioni jashtë Departamentit të Thesarit deri në shqyrtimin e një urdhri të mundshëm të përhershëm.
Sulmi ndaj Medicare dhe Medicaid vjen pasi ekipi i Musk ka marrë kontrollin e disa sektorëve të qeverisë federale, përfshirë Departamentin e Thesarit dhe USAID-in, duke hartuar plane për të bllokuar shpenzimet që i konsiderojnë të tepruara. Me 6.710 punonjës, Centers for Medicare & Medicaid Services është një agjenci me ndikim të madh politik dhe ekonomik, duke menaxhuar rreth 1.5 trilionë dollarë në vit, ose 22% të buxhetit federal të 2024-ës.
Burime të Wall Street Journal sqarojnë se ekipi i Musk ende nuk ka pasur qasje në databazat që përmbajnë të dhëna personale shëndetësore të përfituesve të Medicare ose Medicaid. Ata kanë vetëm qasje të kufizuar në mënyrë “leximi”, që do të thotë se nuk mund të bëjnë asnjë ndryshim në sistem.
Komente
