Senati amerikan ka votuar unanimisht në mbështetje të të drejtave të njeriut dhe demokracisë në Hong Kong dhe kundër shtypjes nga ana e Pekinit të lëvizjes protestuese.
Ligjvënësit amerikan miratuan gjithashtu një ligj që ndalon shitjen e gazit lotsjellës, plumbave të gomës dhe pajisjeve të tjera të përdorura nga forcat e sigurisë për të shtypur protestat që kanë tronditur ish-koloninë britanike për muaj të tërë.
Në deklaratën e senatit thuhet se ‘SHBA i dërgojnë një mesazh të qartë mbështetje protestuesve në Hong Kong, të cilët janë duke luftuar për liritë e dëshiruara prej kohësh. Amerika ka qënë dhe do të jetë me ju ndërkohë që Pekini po minon autonominë tuaj’.
Por përgjigjja e Pekinit nuk ka vonuar. Kina ka sulmuar votën unanime të Senatit amerikan, i cili miratoi 'Aktin e të Drejtave të Njeriut dhe Demokracisë së Hong Kongut', dhe përmes Zëdhënësit të Ministrisë së Jashtme ka kërcënuar me hakmarrje të pa specifikuar.
Ndërkohë në Hong Kong vazhdojnë përplasjet e dhunshme mes protestuesve dhe policisë.
Gjatë mbrëmjes forcat e sigurisë kanë ndërhyrë me forcë në brendësi të Universitetit Politeknik, tashmë i shkatërruar, në përpjekje për të arrestuar rreth 100 protestues që e kanë kthyer ndërtesën universitare në barrikadën e tyre.
Komente
