Shkarkohet nga detyra drejtori i Agjencisë së Sigurisë Kombëtare të SHBA, Timothy Haugh dhe zëvendësja e tij ëendy Noble.
Shkarkimi i Timothy Haugh, i cili gjithashtu drejton Komandën Kibernetike të SHBA - njësia kibernetike sulmuese dhe mbrojtëse e ushtrisë - është një lëkundje e madhe për komunitetin e inteligjencës amerikane që po kalon ndryshime të rëndësishme në dy muajt e parë të administratës Trump.
Demokratët më të lartë në komitetin e zbulimit të Senatit dhe Dhomës së Përfaqësuesve, senatori Mark Warner dhe deputeti Jim Himes, denoncuan shkarkimin e Haugh.
Presidenti republikan Donald Trump, që kur mori detyrën më 20 janar, ka shkarkuar shumë zyrtarë të lartë në agjencitë amerikane dhe ka vendosur besnikë të tij. Elon Musk, i cili drejton përpjekjet e administratës Trump për të shkurtuar dhe përmirësuar fuqinë punëtore të qeverisë federale, vizitoi Agjencinë e Sigurisë Kombëtare muajin e kaluar për të takuar Haugh.
NSA është një nga agjencitë kryesore të inteligjencës së Shteteve të Bashkuara dhe përdor teknologji dhe sisteme të nivelit të lartë, të specializuar për të mbledhur dhe analizuar inteligjencën. Komanda Kibernetike e SHBA kryen operacione sulmuese dhe mbrojtëse dhe monitoron rrjetet e Departamentit të Mbrojtjes.
Komente
