Një sulm me armë në një shkollë të krishterë në Wisconsin ka lënë të paktën 3 persona të vdekur dhe 6 të plagosur.
Ngjarja e rëndë ndodhi mëngjesin e së hënës në shkollën Abundant Life Christian School, në Madison, Wisconsin.
Sipas Daily Mail, burime lokale tregojnë se autori i sulmit ka vrarë veten dhe dyshohet se ka qenë nxënës i kësaj shkolle.
Fillimisht policia ka raportuar për pesë viktima, por në një deklaratë ka sqaruar se tre persona janë të vdekur.
Raportet e para thonë se sulmuesi hyri në shkollë dhe hapi zjarr. Ende nuk dihet nëse viktimat janë nxënës, pjesëtarë të stafit, apo të dyja palët.
Zona rreth shkollës, e cila ndodhet në Dane County dhe ka rreth 390 nxënës nga kopshti deri në klasën e 12-të, është aktualisht e rrethuar nga forca të shumta policore.
Ngjarja ndodhi vetëm pak ditë para pushimeve të Krishtlindjeve, ndërsa nxënësit po përgatiteshin për një ndeshje basketbolli të planifikuar për mbrëmjen e së hënës.
Senatori i Wisconsin-it, Ron Johnson, reagoi në rrjetin X duke thënë:
“Ngushëllimet dhe lutjet e mia më të sinqerta për viktimat e tragjedisë në shkollën Abundant Life Christian School. Do të vazhdoj ta ndjek nga afër këtë situatë.”
Komente
