Një pjesë e autostradës në Filadelfia u shemb pasi një kamion cisternë që transportonte benzinë mori flakë poshtë mbikalimit, thanë të dielën autoritetet federale amerikane. Fatmirësisht nuk u raportuan të lënduar.
Videot në vendin e ngjarjes treguan tymin që ngjitej lart mbi autostradë, ndërsa çisterna vijonte të digjej. Autostrada I-95 është një nga autostradat më të ngarkuara në Shtetet e Bashkuara, që lidh Maine me Florida dhe qytetet kryesore përgjatë Bregut Lindor.
Ajo mbeti e mbyllur në të dy drejtimet në zonën e Filadelfias, thanë zyrtarët.
Videoja tregoi zjarrfikëset në afërsi të mbikalimit të shembur.
Trafiku në të dy drejtimet e autostradës me tetë korsi u ndërpre. Bordi Kombëtar i Sigurisë së Transportit të SHBA-së (NTSB) tha se do të dërgonte një ekip për të hetuar atë që e quajti një zjarr në kamion cisternë me benzinë dhe shembjen e mbikalimit.
Presidenti Joe Biden pasi u informua për shembjen ofroi ndihmë për zyrtarët shtetërorë dhe lokalë, tha sekretarja e shtypit e Shtëpisë së Bardhë Karine Jean-Pierre.
Ndërkohë Sekretari amerikan i Transportit Pete Buttigieg u shpreh se mbyllja e autostradës I-95 do të kishte "ndikime" edhe në Filadelfia.
