TIRANË- Është shënuar viktima e dytë si pasojë e zjarreve në Shqipëri. Pas vdekjes së 64-vjeçarit, Andrea Haxhiaj nga flakët në Asim Zenel në Gjirokastër, ka ndërruar jetë edhe gruaja e tij 57-vjeçare që ishte e shtruar në QSUT.
Tatjana Haxhiaj ishte e shtruar prej 8 ditësh me djegie deri në 75% të trupit dhe si pasojë nuk mundi t'i mbijetonte plagëve.
Ndërkaq në një prononcim për Report Tv, miku i viktimës Andrea Haxhiaj ka bërë me dije se çifti ishte prindër i dy djemve. Njëri nga djemtë jetonte në Tiranë, ku shkollohet e punon, ndërsa djali tjetër jetonte me prindërit në Gjirokastër. Duke e konsideruar një fatkeqësi të madhe ai u shpreh se zjarrfikëset nuk kishin shkuar në kohën e duhur.
Andrea Haxhiaj ndërroi jetë më 3 gusht në fshatin Asim Zeneli në Gjirokastër si pasojë e flakëve që rrethuan banesën e tij. Haxhiaj ka tentuar të shuaj zjarrin në vreshtin që kishte në oborr, por si pasojë e flakëve ka ndërruar jetë.
Fshati Asim Zenel u përfshi nga flakët që kishin rënë në afërsi të tij. Era e fortë favorizoi flakët duke vënë në rrezik 3 fshatrat Krinë, Asim Zeneli dhe Arshi Lengo. Banorët e tre fshatrave u evakuuan, por në Asim Zenel situata ishte më kritike, me një bilanc prej dy viktimash.
Për të normalizuar flakët u vendosën në dispozicion 5 zjarrfikëse, forca të ushtrisë e punonjës të bashkisë, por dëmet shkaktuan një bilanc të rënduar në djegien e kullotave dhe drurëve frutorë, ku në Lunxheri u djegën rreth 40 ha kullota dhe 500 rrënje arrore, dru frutore dhe vreshtari.
Komente
Nese do të kapet krimineli që vuri zjarrin duhet të dënohet për vrasje me dashje.
Përgjigju