Lezhë- Dy nga të rinjtë të cilët ishin në kërkim pas një sherri të ndodhur më 11 prill në qytetin e Lezhës janë vendosur në pranga. Redian Margjonaj dhe një i mitur akuzohen për veprën penale për plagosje e rëndë me dashje dhe prishje të qetësisë publike.
Ndërkohë një 15-vjeçar tjetër i përfshirë në konflikt është shpallur në kërkim.
Pas kontrolleve të kryera blutë kanë sekuestruar një makinë.
Një ditë më parë Policia zbardhi përmes kamerave të sigurisë se ajo që u raportua si një përplasje fizike mes dy personave mesditën e së premtes, në fakt ishte një përleshje e dhunshme mes një grupi njerëzish, që zanafillën e konfliktit e vitin e kaluar mes 2 të miturve, për një vajzë.
Dje në prangat e policisë ranë Fatjon Gjini, 34 vjeç, dhe Ervin Nika, 37 vjeç, ky i fundit i arrestuar më parë për armë pa leje.
Njoftimi i policisë:
Në vijim të hetimeve të thelluara për zbardhjen e një konflikti të ndodhur mesditën e 11 prillit 2025, dhe veprimeve operacionale për kapjen e personave të shpallur në kërkim, për këtë konflikt, në qytetin e Lezhës, shërbimet e Policisë, në kuadër të kontrolleve të shumta të kryera bazuar edhe në inteligjencën policore, kapën dhe arrestuan dy nga shtetasit e shpallur në kërkim, konkretisht shtetasit R. M., 20 vjeç, dhe A. D., 15 vjeç.
Të dy këta shtetas dyshohen për kryerjen e veprave penale “Plagosje e rëndë me dashje”, kryer në bashkëpunim, dhe “Prishja e qetësisë publike”.
Policia ka gjetur dhe sekuestruar në cilësinë e provës materiale automjetin e përdorur në këtë ngjarje.
Gjithashtu, në vijim të veprimeve të thelluara hetimore, është shpallur në kërkim një tjetër 15-vjeçar, shtetasi G. P., banues në Lezhë, i përfshirë në konflikt.
Ndërkohë, hetimet vijojnë për identifikimin dhe lokalizimin e personave të tjerë të përfshirë në këtë konflikt.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.
Komente
