GJIROKASTËR- Një grup kriminal që ushtronte veprimtaritë e falsifikimit të dokumenteve dhe të dhënies ndihmë për kalim të paligjshëm të kufirit është shkatërruar nga Policia e Shtetit.
Nëntë persona kanë rënë në pranga në kuadër të operacionit të koduar 'No chance'. Mes të arrestuarve është edhe kryekomisar Agim Fejzo, me detyrë Shef i Sektorit të Shërbimeve Operacionale në Policinë e Gjirokastrës.
Masa arrest shtëpie ndaj kryekomisarit është zbatuar nga AMP, ndërsa akuzohet për shpërdorim detyre. AMP ka provuar se Fejzo bashkëpunonte me këtë grup kriminal që ushtronte veprimtaritë kriminale të falsifikimit të dokumenteve dhe të dhënies ndihmë për kalim të paligjshëm të kufirit.
Ndërkohë, të arrestuarit janë 4 banues në Gjirokastër, 2 në Tepelenë, 1 në Fier e 1 në Konispol.
“Këta shtetas dyshohet se gjatë viteve 2023 dhe 2024, kanë kryer veprimtarinë kriminale të dhënies ndihmë për kalim të paligjshëm të kufirit dhe të falsifikimit të dokumenteve, kundrejt fitimit’", njoftoi sot policia e shtetit.
Zbulohet laboratori
Po kështu është gjetur laboratori që shërbente për falsifikimin e dokumenteve, si dhe janë sekuestruar një shumë e konsiderueshme parash, automjete dhe sende të tjera të kundërligjshme që shërbenin për ushtrimin e veprimtarisë kriminale.
Arrestohen 2 iranianë
Më parë, gjatë zhvillimit të këtij operacioni, janë arrestuar në flagrancë edhe 2 shtetas iranianë.
Akuzat
Ndaj tyre Gjykata e Gjirokastrës kishte dhënë masën e sigurisë ‘arrest me burg për akuzat “Ndihma për kalim të paligjshëm të kufijve”, “Falsifikimi i dokumenteve”, “Falsifikimi i formularëve, stampave dhe vulave” dhe “Ushtrimi i ndikimit të paligjshëm te personat që ushtrojnë funksione pubklike”.
9 muaj hetim
Bëhet fjalë për një hetim 9-mujor të ndjekur me metoda speciale nga Drejtoria për Hetimin e Narkotikëve dhe Trafiqeve, në bashkëpunim me Drejtorinë e Forcës së Posaçme Operacionale, në Departamentin e Policisë Kriminale, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër.
Agjencia e Mbikëqyrjes Policore (Rajoni Vlorë - Gjirokastër) ka ekzekutuar masën e sigurisë “Arrest në shtëpi” për punonjësin e policisë, Kryekomisar Agim Fejzo, me detyrë Shef i Sektorit të Shërbimeve Operacionale në DVP Gjirokastër, i dyshuar për veprën penale “Shpërdorim detyre”
Nga hetimet intensive disa mujore nën drejtimin e Prokurorisë pranë Gjykatës së Shkallës së Parë të Juridiskionit të Përgjithshëm Gjirokastër, në bashkëpunim me Drejtorinë për Hetimin e Narkotikëve dhe Trafiqeve dhe Drejtorinë e Forcës së Posaçme Operacionale, në Departamentin e Policisë Kriminale, u siguruan prova se punonjësi i policisë ka bashkëpunuar me një grup kriminal që ushtronte veprimtaritë kriminale të falsifikimit të dokumenteve dhe të dhënies ndihmë për kalim të paligjshëm të kufirit.
