Shkodër- Një person i maskuar, i armatosur dhe me motor dështoi në tentativën e grabitjes së një argjendarie në qytetin e Shkodrës.
Ngjarja ka ndodhur rreth orës 11:30 të ditës së sotme (29 gusht), në lagjen “Vasil Shanto”, teksa ishte pronari i dyqanit që diktoi lëvizjen e dyshimtë të personit të paidentifikuar ende, që kur u pikas teksa u fut në argjendari, braktisi mjetin, kërcënoi tregtarin e floririt me armë nëse e ndiqte dhe u arratis në këmbë.
Burime policore bënë me dije se një shtetas ende i paidentifikuar, që qarkullonte me motomjet, ka qëndruar para një argjendarie dhe me skafandër në kokë është futur në argjendari. Pronari i argjendarisë i ka kërkuar që të heqë skafandrën, por ai ka refuzuar dhe është larguar me vrap, duke lënë edhe motomjetin para argjendarisë.
Dyshohet se jashtë ambienteve të saj, ai i ka drejtuar një armë zjarri pronarit të argjendarisë që të mos ta ndiqte për ta kapur.
“Shërbimet e Policisë kanë shkuar menjëherë në vendin e ngjarjes dhe vijojnë kontrollin në zonë për kapjen e tij”, thanë burime zyrtare.
Kurse grupi hetimor, nën drejtimin e Prokurorisë, po punon për identifikimin e autorit dhe dokumentimin ligjor të rastit.
Komente
