SHKODËR- Kur nuk kanë kaluar 24 orë nga plagosja në Shkodër, Report Tv mëson nga burime zyrtare se është identifikuar autori dhe po punohet për kapjen e tij.
Ngjarja ndodhi mbrëmjen e së hënës, rreth orës 22:20 në lagjen “Tre Heronjt”, ku i plagosur mbeti Eduart Lekndreaj 24-vjeç. Nga raportimet paraprake, shkak dyshohet të ketë qenë një konflikt i çastit, megjithatë vijojnë hetimet për zbardhjen e plotë të ngjarjes.
Lekndreaj ka marrë plagë në këmbë, por mësohet se ndodhet jashtë rrezikut për jetën.
"Më datë 11.01.2021, rreth orës 22:20, në Spitalin Rajonal Shkodër ka shkuar i dëmtuar në këmbë, dyshohet me armë zjarri shtetasi E. L. 24 vjeç, banues në Shkodër, i cili ndodhet jashtë rrezikut për jetën. Nga verifikimet paraprake ka rezultuar se ngjarja ka ndodhur në lagjen “Tre Heronjt”, Shkodër, dyshohet si pasojë e një konflikti të çastit. Në vendin e ngjarjes ndodhen shërbimet e policisë dhe vijon puna për kapjen e autorit, i cili është identifikuar nga Policia. Grupi hetimor nën drejtimin e Prokurorisë po punon për sqarimin e rrethanave të ngjarjes", njofton policia.
