Policia e Shkodrës bashkë me njësinë “DELTA” dhe Policinë Kufitare të Malit të Zi kanë zhvilluar patrullime intensive në hapësirën ujore të qarkut Shkodër dhe në kufirin tokësor Shqipëri-Mal i Zi. Në operacion, i cili u mbështet nga agjencia evropiane FRONTEX, mori pjesë edhe Administrata e Parkut Kombëtar të Liqenit të Shkodrës.
Objektivat kryesore të këtij operacioni janë:
Parandalimi i veprimtarive të paligjshme në ujë, përfshirë trafikimin e drogës, armëve, kalimin e paligjshëm të kufirit dhe krimet ndaj mjedisit;
Rritja e sigurisë për qytetarët dhe turistët në zonë;
Forcimi i kontrollit në zonat kufitare;
Identifikimi i pikave problematike në kufijtë tokësorë dhe ujorë;
Shkëmbimi i informacionit me partnerët rajonalë;
Goditja e kultivimit të bimëve narkotike.
Kontrollet u përqendruan në zonat më të frekuentuara nga mjetet lundruese, si liqeni i Shkodrës, lumi Buna, pikat strategjike tokësore dhe ujore, si dhe kufiri tokësor Shqipëri-Mal i Zi. Gjatë fazës së parë të këtij plani operacional, u kontrolluan dokumentacioni i mjeteve lundruese, pajisjet e sigurisë, respektimi i itinerareve të miratuara dhe rregullat e qarkullimit ujor.
Drejtoria Vendore për Kufirin dhe Migracionin Shkodër garanton se kontrollet do të vijojnë gjatë gjithë sezonit veror në kuadër të planit “LIQENI 2025”. Ky bashkëpunim ndërinstitucional tregon angazhimin e lartë policor për sigurinë e qytetarëve dhe turistëve, parandalimin e veprimtarive kriminale dhe forcimin e besimit ndaj institucioneve të rendit.
Komente
