Një klasë në shkollën 9 vjeçare “5 shkurti” të Ballshit është përfshirë nga flakët. Zjarrfikësit kanë mbërritur në vendngjarje dhe kanë bërë të mundur vënien nën kontroll të flakëve.
Fatmirësisht nga ngjarja nuk ka patur nxënës apo mësues të dëmtuar. Raportohet vetëm për dëme matieriale. Për këtë ngjarje ka reaguar edhe ministrja e Arsimit dhe Sportit, Evis Kushi e cila u shpreh se ngjarja po ndiqet me vëmendje.
Sipas burimeve raportohet se shkak për zjarrin që ka shkrumbuar librat dhe bankat e klasës, ka qenë një shkëndijë elektrike. Ndërkohë grupi hetimor po punon për zbardhjen e plotë të rrethanave që shkaktuan rënien e zjarrit.
Ministrja e Arsimit, Evis Kushi është shprehur se mësimi në shkollën që u përfshi nga flakët në Ballsh, do të rinisë më 5 janar, njëlloj si në shkollat e tjera në vend.
Kushi theksoi se ngjarja po ndiqet me vëmendje ndërsa falënderoi të gjithë zjarrfikësit dhe forcat e posaçme që ndërhyjnë në kohë rekord.
“Po ndjekim nga afër me vëmendje zhvillimet në lidhje me ngjarjen e ndodhur në shkollën 9-vjeçare "5 Shkurti" në Mallakastër, ku si pasojë e zjarrit në njërën prej klasave janë shkaktuar dëme fizike dhe materiale.
Sipas informacioneve zyrtare paraprake, shkak i zjarrit ka qenë një shkëndijë elektrike, por megjithatë kërkoj nga organet kompetente, jo vetëm Policia e Mallakastrës por edhe Bashkia, si institucioni përgjegjës për sigurinë e shkollës, që të bëjnë sa më parë një hetim të plotë të shkaqeve që çuan në këtë incident.
Falënderoj veçanërisht punonjësit e zjarrfikëses dhe personelin e shkollës, të cilët kanë ndërhyrë në kohë rekord, duke parandaluar përhapjen e zjarrit në klasat e tjera.
Dëshiroj të informoj opinionin publik se po marrim të gjitha masat, në bashkëpunim me Bashkinë dhe Zyrën Arsimore Mallakastër, që shkolla të jetë gati për të pritur nxënësit ditën e enjte, më datë 5 janar, kur rinis procesi mësimor në të gjitha shkollat e vendit.”- shkroi Kushi.
