SHKUP - Është shtyrë seanca në Gjykatën Kushtetuese për gjuhët në Maqedoninë e veriut, ku edhe kërkohet heqja e statusit të veçantë të gjuhës shqipe.
Megjithatë, Gjykata Kushtetuese ka vendosur të zhvillojë një seancë përgatitore për Ligjin e Gjuhëve, ku do të dëgjohen mendimet e ekspertëve “pro” dhe “kundër” mbi dispozitat kontestuese, ndërsa sot nuk do të ketë vendim, raportojnë mediat vendase.
Seanca u miratua pavarësisht kundërshtimit të gjykatëses Dobrilla Kacarska dhe bojkotit të dy gjykatësve shqiptarë Osman Kadriu dhe Naser Ajdari.
Gjykatësi i komunitetit turk, Fatmir Skender, braktisi gjithashtu seancën, duke propozuar që në fillim, shtyrjen e saj – kërkesë kjo e refuzuar njëzëri nga gjashtë gjykatësit e tjerë.
Gjykatësi Kadriu, në daljet e tij publike iu referohej konkluzës së miratuar më herët nga Gjykata Kushtetuese, që për rastin e “Ligjit për Përdorimin e Gjuhëve” duhet të vendoset me përbërje të plotë të Gjykatës Kushtetuese.
Çështja ka shkaktuar debate të ashpra, veçanërisht për përdorimin e shqipes në kartëmonedha, procedura gjyqësore dhe uniforma, si dhe për mënyrën e shpalljes së ligjit pa firmën e presidentit Ivanov.
Gjykata thekson nevojën për transparencë dhe përfshirjen e mendimeve të ekspertëve dhe partive për këtë çështje të ndjeshme dhe komplekse.
Komente
