PËRMET- Një tjetër incident ka ndodhur në ceremoninë përkujtimore të ushtarëve grekë të rënë gjatë luftës italo-greke në Shqipëri.
Pas sulmit që një grek bëri ndaj policisë shqiptare në fshatin Bularat në Dropull të Gjirokastrës, një tjetër incident ka ndodhur në ceremoninë e zhvilluar tek varrezat greke në Këlcyrë.
Aktivistja e çështjeve kombëtare, Elida Jorgoni, ka denoncuar shoqërimin në komisariat nga Policia e Shtetit gjatë kësaj ceremonie.
Në një reagim për Report Tv dhe Shqiptarja.com, Jorgoni thotë se organizimi i saj ka qenë paqësor.
Kam shkuar paqësisht. Nuk kisha asnjë njeri me vete, përveç një tabele Çamërie. U nisa vetëm nga Tirana. S’e kuptova këtë shoqërim anti-ligjor, se shteti ynë dhe policia s’duan të prishin marrëdhëniet me grekët. Më morën forcërisht dhe më futën në makinë. Më mbajtën 2 orë e gjysëm në komisariat dhe më pas më liruan. Unë e kisha njoftuar policinë se do të isha në këtë ceremoni për të protestuar, pasi ne nuk shkojmë dot në Çamëri.
Elida Jorgoni, aktiviste e çështjeve kombëtare
