Tiranë- U shiti drogë dy të rinjve, arrestohet në flagrancë 26-vjeçari në kryeqytet, teksa nën hetim janë edhe blerësit e mallit.
Operacioni është zhvilluar nga Komisariati nr. 1 në Tiranë dhe u konfirmua sot (24 Shtator), i koduar "Trisha" dhe që kishte objektiv goditjen e rrjetit të shpërndarësve.
Sekuestrohen doza të lëndës së dyshuar narkotike kanabis, gati për shitje, kurse ndërhyrja u bë në rrugën "Petro Nini Luarasi".
“Si rezultat i tij u arrestua në flagrancë shtetasi H. H., 26 vjeç, banues në Tiranë, për veprën penale "prodhimi dhe shitja e narkotikëve", njoftoi policia.
Gjithashtu u referuan materialet në Prokurorinë e Tiranës për procedim në gjendje të lirë edhe për të dyshuarit E. M., 24 vjeç, dhe A. Sh., 20 vjeç, të dy banues në kryeqytet.
“Gjatë kontrollit fizik u janë gjetur doza të lëndës së dyshuar narkotike kanabis, të cilat u sekuestruan në cilësinë e provës materiale dhe që ia kanë blerë shtetasit H. H.”, sqaroi policia detajet e aksionit.
Në vijim të veprimeve, gjatë kontrollit fizik, edhe 26-vjeçarit iu gjetën sasi droge kanabis, gati për shitje, por pa e saktësuar peshën e saj.
