Tre punonjës të një firme private, "Elba gas" janë plagosur paraditen e sotme si pasojë e një shpërthimi në repartin e oksigjenit te ish-Metalurgjiku në Elbasan. Aksidenti në punë ka ndodhur rreth orës 10:30.
Të plagosurit janë babë e bir, Osman dhe Eduard Bendaj 69 dhe 42-vjeç dhe Qemal Mullahu 61-vjeç. Tre të plagosurit ndodhen nën kujdesin e mjekëve. Report Tv mëson se njeri nga të plagosurit, Osman Bendaj është në gjendje të rëndë për jetën.
Nisur nga gjendja kritike 61-vjeçari ndodhet në reanimacion. Tekniku i mesëm mësohet se ka plagë në fytyrë nga shpërthimi në repartin e oksigjenit si pasojë e bllokimit të filtrit. Po sipas burimeve nga vendi i ngjarjes, mësohet se gjatë punës ka shpërthyer një tub furnizimi me gas, por nuk ka pasur flakë.
Menjëherë shërbimet e policisë dhe të zjarrfikëses kanë shkuar në vendngjarje të cilët kanë bërë të mundur mbylljen e gazit dhe shmangien e tragjedisë.
Grupi hetimor ndodhet në vendngjarje dhe po punon për zbardhjen dhe sqarimin e rrethanave të ngjarjes, teksa paraprakisht dyshohet se shpërthimi ka ardhur si pasojë e një defekti teknik.
Dhoma në Spitalin e Elbasanit ku po mjekohen të plagosurit
