Imami i xhamisë "Dine Hoxha", Ahmed Kalaja, e quajti akt barbarie plagosjen e 5 persona brenda xhamisë. Ai thotë se 34-vjeçari ka hyrë i armatosur me thikë në xhami dhe ka qëlluar disa persona nga stafi i xhamisë dhe disa besimtarë që kanë qenë duke u falur. Ndërkaq Kalaja thotë se shpreson të mos ketë qenë ndonjë akt terrorist, por personi të jetë me probleme mendore.
“Sot pas dreke andej nga ora 14:00 ka ndodhur një akt barbarie pranë xhamisë Dine Hoxha ku një njeri i armatosur me thikë godet besimtarët. Po nuk mjaftohet vetëm me besimtarët por godet dhe njerëzit në rrugë. Ai është arrestuar situata është nën kontroll. Të plagosurit janë në spital, shpresojmë të mos ketë qenë ndonjë akt terrorist por të ketë qenë një person me probleme mendore. Zoti i madh largoftë nga ne njerëzit që janë me probleme dhe që duan të prishin harmoninë e këtij muaji të begatë. Janë plagosur disa nga stafi i xhamisë dhe disa besimtarë që kanë qenë duke adhuruar zotin në ato momente. Personi në fjalë të marrë atë që meriton”, tha Kalaja.
Lajmi kryesor:
Sulm me thikë në xhaminë te Rruga e Kavajës! Autori qëllon punonjësin e picerisë dhe 4 besimtarë, arrestohet për sulm terrorist! Familjarët: Është në depresion (VIDEO)
//ReportTv.al