TIRANË- Shqipëria dhe Greqia do të bashkëpunojnë për të lehtësuar lëvizjen e qytetarëve kryesisht për festa dhe gjatë sezonit turistik. Ky lehtësim do të nisë që prej javës së ardhshme për festën e Pashkëve.
Lajmi u bë me dije nga zëvendësministri i Brendshëm Andi Mahila gjatë një takimi që me zëvendësministrin e Mbrojtjes Qytetare dhe Emigracionit të Greqisë, Eleftherios Oikonomou në kufirin me Shqipërinë.
“Menaxhimi i fluksit të hyrjeve-daljeve të shtetasve dhe të mjeteve, në pikat e kalimit kufitar, vazhdon të jetë një preokupim i strukturave tona përgjegjëse, reciproke. Një nga temat kryesore të bisedimeve të sotme ishte pikërisht koordinimi dhe organizimi në detaj i punës me qëllim lehtësimin e lëvizjes së qytetarëve tanë. Synojmë fillimisht lëvizje të sigurt dhe pa probleme, kryesisht për periudhat e festave siç është kjo e Pashkëve, gjatë javës së ardhshme, por patjetër edhe gjatë sezonit turistik dhe festave të fundvitit. Bashkërendimi i veprimeve tona të përbashkëta për vënien në funksion të Qendrës së Përbashkët të Bashkëpunimit Policor dhe Doganor, marrëveshje e cila është nënshkruar midis dy qeverive tona, dhe ratifikuar nga parlamentet respektive, ishte një temë tjetër diskutimi e takimit të sotëm”, tha Mahila.
