Pogradec- Teksa pjesa më e madhe e Shqipërisë ndodhet nën pushtetin e stuhive dhe rebesheve të shiut që kanë shkaktuar përmbytje në disa qytete, nuk mungojnë as vatrat e zjarrit si paradoks edhe pse temperaturat janë ulur ndjeshëm.
Një zjarr në një sipërfaqe me barishte në afërsi të lokaleve dhe një pike karburanti u shfaq pasditen e sotme në Pogradec.
Gazetari Armand Braho informon se zjarri ka rënë në afërsi të fshatit Pojskë, ndërkohë që për gati 30 minuta është bllokuar qarkullimi i mjeteve në aksin Pogradec-Lin, për shkak se zjarri ishte në afërsi të karburantit. Report Tv ka siguruar edhe pamjet e tymit dhe zjarrit.
Zjarri aktualisht është neutralizuar dhe ndodhet nën kontrollin e zjarrfikësve. Në momentet e para, flakët u përhapën me shpejtësi për shkak të erës së fortë, por fatmirësisht reshjet e shiut dhe ndërhyrja e shpejtë e zjarrfikësve bënë të mundur vënien nën kontroll të situatës.
Nga flakët u rrezikuan katër lokale, ndërsa zjarri kërcënoi të përhapej edhe pranë një karburanti, duke shtuar rrezikun. Paraprakisht raportohet se dëmet e shkaktuara janë vetëm në disa sipërfaqe kullotash të djegura.
Komente
