Në zemër të Aeroportit Ndërkombëtar të Rinasit, aty ku nis dhe përfundon udhëtimi i qindra mijëra vizitorëve çdo muaj, është hapur një hapësirë e veçantë që mbart brenda saj frymën, ngjyrat dhe aromat e Shqipërisë. “Buy Albania”, dyqani me produkte “tax free” kushtuar kulturës, artizanatit dhe kulinarisë shqiptare, është më shumë se një pikë tregtare , është një udhëtim estetik në identitetin tonë kombëtar.
Një koncept që bashkon traditën me bashkëkohoren
“Buy Albania” është konceptuar si një urë mes trashëgimisë dhe modernes, një vend ku tradita shqiptare nuk shihet si kujtim, por si gjallëri e përditshme. Çdo raft, çdo detaj dhe çdo ngjyrë brenda hapësirës është ndërtuar për të përcjellë një ndjesi të qartë: krenarinë për atë që jemi.
Dizajni i brendshëm është i ndërtuar me tonet e kuq e të zezë, të ndërthurura me elemente natyrale si druri i ngrohtë, zjarri i bakrit dhe jeshilja e ullirit, duke krijuar një kontrast të sofistikuar që të kujton energjinë dhe butësinë e njëkohshme të kulturës shqiptare.
Në murin kryesor bie në sy një panel i madh dekorativ me motive gjeometrike të frymëzuara nga qilimat e vjetër shqiptarë, që i japin hapësirës një karakter simbolik , si një portë që të fton të hysh në botën e trashëgimisë sonë.
Objekte që tregojnë histori
Nëpër rafte, vizitori gjen një pasuri të tërë objektesh që përfaqësojnë Shqipërinë e shumëllojshme: pliset e bardha tradicionale, xhamadane të punuar me dorë, lodra druri e figura artizanale, filxhanë me motive etnike, lodra muzikore, daulle e çifteli të vogla, por edhe produkte kulinare si vaj ulliri, mjaltë, reçelë, verë e raki vendase.
Çdo produkt është zgjedhur me kujdes, duke përfaqësuar mjeshtrit shqiptarë nga krahina të ndryshme të vendit , që nga punimet e argjendta të Gjirokastrës, tek tekstilet e qëndisura të Shkodrës e deri te qeramika shumëngjyrëshe e Kavajës.
Një hap simbolik për identitetin kombëtar
Hapja ne Airportin e Tiranes i “Buy Albania” është një hap i rëndësishëm në mënyrën se si Shqipëria prezanton veten përpara botës. udhëtari mund të marrë me vete një copëz të gjallë të vendit një produkt që mban brenda aromën, punën dhe shpirtin e tokës shqiptare, Shqipërinë te të gjitha senset .
Ky projekt është gjithashtu një ftesë për turizëm kulturor, një përpjekje për të ndërtuar një imazh të unifikuar të vendit që shkon përtej plazheve e maleve , drejt një identiteti të plotë që ndërthur shijen, mjeshtërinë dhe traditën.
Dizajni që flet shqip
Dizajni i brendshëm i “Buy Albania” është një histori më vete. Kombinimi i elementeve tradicionale me arkitekturën moderne të ndriçimit, strukturat e drurit dhe kompozimet simetrike krijojnë një atmosferë të ngrohtë dhe elegante.
Përmes dritës së butë të projektorëve dhe nuancave të thella të kuqit, hapësira fiton karakter ceremonial, sikur çdo vizitor të jetë i ftuar në një ekspozitë që i përket kujtesës sonë kolektive.
Në tavan, degë ulliri dhe simbole mbrojtëse tradicionale (si “syri i kaltër”) sjellin prekje autentike të Mesdheut dhe besimeve popullore që kanë shoqëruar jetën shqiptare brez pas brezi.
Një ambasadë e vogël e Shqipërisë në TIA
“Buy Albania” është më shumë sesa një dyqan , është një ambasadë kulturore që pret e përcjell udhëtarët me krenari. Një vend ku Shqipëria tregohet përmes detajeve: nga aroma e kafesë shqiptare te ndriçimi që pasqyron ngjyrat e flamurit, nga mjeshtria e dorës te kujdesi në çdo detaj dizajni.
Në portën hyrëse të vendit, “Buy Albania” na kujton se kombi nuk prezantohet vetëm me fjalë e slogane, por edhe me objekte që flasin vetë , me art, kulturë dhe dashuri për rrënjët.
