TIRANE- Këtë vit Shqipëria ishte Vendi i Nderit në panairin global të turizmit në Berlin, që është panairi më i madh në botë.Shqipëria turistike është një destinacion tashmë i konfirmuar jo vetëm në Ballkan por dhe më gjerë. Në një paketë u projektua që të prezantoheshin të gjitha bukuritë, natyrore, të trashëgimisë natyrore, kulinarinë, agroturizmin, gjithçka që Shqipëria turistike ofron sot.
“Panairi i Berlinit ishte zgjedhja e duhur për të goditur fuqishëm në prezantimin e Shqipërisë turistike si destinacion jo vetëm shumë autentik por destinacion që prezanton turizëm të qëndrueshëm dhe synon të bëhet gjithë vjetor’ tha sot Zana Çela Drejtoresha e Agjencisë Kombëtare të Turizmit në një intervistë me skype nga Berlini për emisionin “Sot Live në Shqipëri’ Në Report Tv.
Në stendën e Shqipërisë u prezantuan 50 biznese të industrisë së turizmit, nga agjenci turistike të turizmit, hoteleri, e kompani investitorësh të mëdhenj.
“Janë 50 biznese që të gjitha kanë realizuar marrëveshje e negociuan për vitet e ardhshme. Nuk flitet për 2025 se ato janë të mbyllura që vjet, por flitet për vazhdimësinë e 3 viteve të ardhshme, 2026, 2027, 2028. Janë që të gjithë shumë të gëzuar. Prezantimi I këtij viti pati një impact shumë të mirë” nënvizoi Çela.
Qeveria synon që të krijojë një turizëm gjithëvjetor dhe të qëndrueshëm.
Komente
