Shqiptarët e vitit 2024 kanë punuar më pak se një vit më parë, por sërish dukshëm më shumë se europianët. Të dhënat e fundit tregojnë se orët mesatare javore të punës në Shqipëri kanë rënë nga 41.6 në vitin 2023 në 41.3 në vitin 2024. Një ndryshim i vogël, pothuaj i padukshëm, por mjaftueshëm për të thënë se shqiptarët kanë ulur shpejtësinë. E megjithatë, edhe pas këtij “pushimi”, diferenca me Bashkimin Europian mbetet e fortë. Mesatarja e BE-së është vetëm 36 orë në javë, pra pesë orë më pak se tek ne, gati një ditë pune shtesë.
Në vitin 2024, të dhënat mbi orët mesatare javore të punës tregojnë se sektori ku individët punojnë më shumë është ai i tregtisë, transportit, hotelerisë dhe shërbimeve të biznesit dhe administrative me një mesatare prej 46.8 orë në javë. Ky grup përfshin aktivitete me ritëm të lartë dhe shpesh kërkon orare të zgjatura, duke reflektuar një intensitet të madh pune. Pas tij vjen sektori i prodhimit me 46.4 orë në javë, ku puna në linjat e prodhimit dhe fabrikat kërkon përkushtim të vazhdueshëm dhe shpesh përmbushje të normave ditore. Edhe ndërtimi me 45.1 orë dhe industritë nxjerrëse, energjia, gazi dhe furnizimi me ujë me 43.2 orë në javë paraqesin një ngarkesë të konsiderueshme, duke reflektuar natyrën fizike dhe teknike të punës në këto fusha.
Në anën tjetër, bujqësia ka mesataren më të ulët me 35.5 orë në javë, gjë që mund të lidhet me sezonin, natyrën e decentralizuar të punës dhe faktin që shumë punëtorë janë të vetëpunësuar. Sektori publik, në dukje më i “rehatshëm”, mbyllet me 40.5 orë në javë, që tregon për një strukturë më të rregullt të orarit të punës dhe respektim të rregullave ligjore në sektorin publik. Në përgjithësi, sektori privat dhe ai që lidhet me shërbimet komerciale ka tendencë të ketë ngarkesë më të madhe pune, ndërsa sektorët publikë dhe bujqësia paraqesin një ritëm më të moderuar.
Një shqiptar punon pesë orë më shumë në javë se një europian mesatar. Diferenca bëhet edhe më ekstreme me Holandën, ku jeta profesionale mbyllet pas 32.1 orësh. Kjo do të thotë se një holandez ka thuajse dy ditë të lira më shumë çdo muaj, ndërsa një shqiptar kalon më shumë kohë në punë, shpesh pa e parë të reflektohet në mirëqenie. Fqinjët tanë mbajnë të njëjtin hap me ne, Serbia me 41.3 orë, Bosnja me 41.1, ndërsa Turqia shënon rekordin rajonal me 43.1 orë./ SCAN
Komente
